Charter Document - 05270090

Nos frater Amideus permissione diuina humilis abbas et conuentus ecclesie Sancti Stephani Dyuionensis notum facimus omnibus presentes litteras inspecturis quod nos uendidimus concessimus et quittauimus in hereditatem perpetuam uiro uenerabili magistro Alberico decano Christianitatis Dyuionensis mansum totum in quo fuit domus defuncti Uualteri Sarragin cum cellario et muralibus ac fundo et omnibus pertinentiis appenditiis ac iuribus ipsius mansi prout usque ad domum que fuit Perronetti Aisere se ingerit qui mansus situs est Dyuione in uico Nouo iuxta mansum dicti decani qui fuit au Chiffolat ex una parte et iuxta domum Mairotti ex altera De cuius uenditionis precio iusto et legittimo in utilitatem ecclesie nostre posito totaliter et conuerso plenam perfectam et integram solutionem recepimus et habuimus a decano predicto in pecunia numerata et propter hoc de toto manso predicto et de cellario muralibus et fundo ac omnibus pertinentiis et appenditiis ac iuribus ipsius mansi prout modo predicto se ingerit Nos omnino deuestiuimus decanum predictum corporaliter inuestiuimus et tenemur ac promittimus bona fide predictum mansum cum cellario muralibus et fundo et omnibus pertinentiis appenditiis ac iuribus predicti mansi prout modo premisso se ingerit garantire dicto decano et eius heredibus perpetuo contra omnes et nos pro ipso et eius heredibus semper et ubique locorum et in omni curia contra personas omnes opponere propter hoc et respondere propriis sumptibus et eos inde conseruare modis omnibus indempnes si qui calumpniatores apparerent quod absit et in nullo de cetero per nos uel per alios uerbo uel facto siue consensu uel modo alio contraire Ad predictam autem garantiam portandam et ad omnia et singula supradicta tenenda facienda et obseruanda per nos et nostros successores nostros et omnia bona ecclesie nostre in cuius utilitatem uersa est dicta pecunia [tam mobilia quam immobi]lia tam presentia quam futura principaliter et specialiter obligamus In quorum omnium memoriam et munimen presentibus litteris sigilla nostra nostra apposuimus Actum anno Domini MCC quinquagesimo octauo mense augusto