Charter Document - 05270085

Uniuersis presentes litteras inspecturis Galterus dominus de Fauerneio miles rei geste notitiam cum salute De sui natura mortale tributum tenetur soluere conditionis misere miser homo post solutionem sic factam siue bonum siue malum in uita sua egerit recepturus Quod attendens ego Galterus predictus cupiensque mee saluti anime prouidere pro iniuriis quas ego parentes et antecessores mei frequenter irrogavimus Deo et prioratui de Fauerneio qui ad ecclesiam Beati Stephani Diuionensis pleno iure disnoscitur pertinere eidem prioratui et si non ad plenum prout tamen potui satisfeci satisfactionemque predictam presentibus feci litteris annotari in perpetuam memoriam et munimen In primis confirmo ratas et gratas habeo omnes elemosinas quas ego parentes fratres et sorores et quicumque alii fecimus et omnes acquestus factos siue sint de feodo meo siue de dominio siue ex quacumque alia de causa ius habere poteram peto etiam ueniam super eo quod non solui decimas de uinea mea sita apud Fauerneium circa castrum confiteorque me debere decimam prioratui predicto et in mee anime periculum non soluisse Promitto si quidem me de cetero soluturum priori qui preest uel qui pro tempore fuerit integre decimam de uinea prenotata et de omnibus aliis uineis sitis inter duo fossata circa castrum Fauerneii quas in presenti habeo uel habiturus fuero in futurum siue uinee fuerint siue redacte in agriculturam fuerint prout superius est expressum Sciendum uero quod si pactiones fecero cum domino Guillelmo fratre meo uel cum quolibet alio de uinea qua modo tenet ad certum tempus easdem pactiones non possum facere nisi salua decima prioris predicti Quod si contingeret eandem uineam ad agriculturam redigi simili modo soluerem decimam integre ac perfecte animalia uero dicti prioratus cuiuscumque speciei existant per totum dominium et iurisdictionem meam poterunt pasturare et si dampnum fecerint nullam emendam uel pargiam persoluet prior michi uel mandato meo sed solummodo dampnum si quod fecerint uel pauperiem prior restituet passo dampnum sciendum etiam quod prior aut mandatum ipsius prata sua sequabit metetque segetes suas non obstante banno meo in iurisdictione mea quando sibi uidebitur expedire Hec omnia et singula prout superius sunt expressa iuro per sancta Dei euuangelia in perpetuum me fideliter seruaturum nec contraueniam nec consentiam nec consilium uel auxilium dabo contrauenire uolenti Ego uero Uuillermus filius Galteri predicti omnia que superius sunt expressa iuro tenere ac seruare inuiolabiliter toto tempore uite mee nosque Galterus et Uuillermus predicti heredes et successores nostros obligamus ad obseruationem omnium predictorum In quorum omnium predictorum testimonium et munimen sigilla uirorum uenerabilium domini Petri Dei permissione abbatis Sancti Benigni et magistri Alberici decani Christianitatis Diuionensis nos Galterus et Uuillermus predicti presentibus litteris fecimus et rogauimus apponi Actum anno Domini MCC quinquagesimo octauo mense marcio