Charter Document - 05270061

In nomine Domini amen Nos Uualterus dictus li Chifolaz et Milo fratres pro utilitate et necessitate nostra uendidimus concessimus et quittauimus in hereditatem perpetuam uiro uenerabili et discreto magistro Alberico decano Christianitatis Dyuionensis mansum unum situm Dyuione in uico Nouo iuxta mansum relicte Uualteri Sarragin defuncti ex una parte et iuxta mansum domini Petri Potot presbiteri ex altera prout mansus predictus uenditus se ingerit a uico predicto usque ad mansum dicti decani qui fuit Andree Uarranio De cuius uenditionis precio nos tenemus et habemus in numerata pecunia penitus pro pagatis et propter hoc de dicto manso nos omnino deuestiuimus et dictum decanum corporaliter inuestiuimus [t]enemur et promittimus sub obligatione bonorum nostrorum omnium mobilium et immobilium presentium et futurorum per sacramentum nostrum pro nobis et nostris heredibus quos obligamus ad hoc prestitum corporale dictum mansum garantire dicto decano et suis heredibus contra omnes perpetuo quittum et liberum ab omni exactione et onere pro recto censu et nos pro ipso et suis heredibus semper et ubique locorum in omni curia ratione dicti mansi propriis sumptibus opponere et respondere et eos inde conseruare modis omnibus indempnes si qui calumpniatores apparerent quod absit et in nullo de cetero per nos uel per alios uerbo uel facto uel consensu uel iure quolibet alio contraire Hanc autem uenditionem ego Maria uxor dicti Uualteri laudo et ratam et firmam habeo spontanea non coacta et promitto in perpetuum habere iuramento prestito corporali et in nullo de cetero per me uel per alium ratione dotis uel donationis propter nuptias uel iure quolibet alio contraire In quorum omnium testimonium et munimen nos Uualterus Milo et Maria presentibus litteris sigilla uirorum uenerabilium domini Amidei abbatis Sancti Stephani et domini Mercatoris decani capelle ducis Dyuionensis fecimus apponi Actum anno Domini MCC quinquagesimo quinto mense februario