Charter Document - 05270056

Nos Hugues de Borgoingne facons sauoir a touz cels qui uerront cels presentes lettres que comme messires Gautiers sires de Fauerne nostre feiz nos ait uendu lou siege de son mulin de Fauerne et totes les droitures d'icelui siege en aigue et en escluses et en fonz et en autres et tout ce nos ait quitte permaingnablement a nos et a noz hoirs et nos en ait reuestu et lou nos soit tenuz a garantir a nos et a nos hoirs contre touz permaingnablement sur lui et suis ses biens et par son sairement et san soit tenuz por paiez nos totes cels choses accomplies li auons promis de grace et d'amor que nos ferons faire mulin enterinement en cels siege et li auons preste en deniers companz quatre cenz et cinquante liures de Digenois que il nos doit et quant li mulins serai faiz il et li sien hoir i auront la moitié en touz estefiez et en totes rentes et toutes issues et en tous proaiges et en poissons et en totes autres choses quex queles soient et nos l'autre en tel meniere que nos et nostre hoir tanrons la soe moitie ne il ne li suen ni pranront riens tant que il aient randu a nos ou a noz hoirs les quatre cens et cinquante liures et quant eles seront paiees il et li suen auront et tanront la leur moitie et chascun au tant com il deront les deniers desus nomez il encharrai un boisseau de ble en esquitance et en tel meniere que il ne porront ne ne doivent icele luer moitie ne uendre ne doner ne engaigier ne en nule autre meniere aliener mais que a nos et a noz hoirs se n'est pas nostre uolente et par nostre congie En tesmoing de ceste chose nos auons mis nostre seal en cels lettres Ce est fait en l'an de grace M et CC et L et cinc ou mois de nouembre