Charter Document - 05270055

Nos Hugues dux de Borgoingne facons sauoir a touz cels qui uerront cels presentes lettres que en nostre presence estaubliz nostre feiz messires Gautiers sires de Fauerne cheualiers ai reconeu deuant nos que por choses que il ai uendues en la terre de Chasteillon qui mouvoient de l'erietaige Guillemin son fil il ai baillie et deliure et quitte au deuant dit Guillemin son fil la uigne qui est entor la Mote de Fauerne si comme ele se porte en toutes parties et l'an reuesti deuant nos et cil Guillemins li ai otroiee deuant nos a la uie celui Gautier en tel meniere que cil Gautiers ne la puet aliener de lui par don ne par uendue ne par uendue ne par gagiere ne faire en autre meniere quele quele soit que tantost après la mort d'icelui Gautier li dite uigne ne reuigne au deuant dit Guillemin en herietaige por faire sa uelonte et ou tesmoing de ceste chose par la priere de l'une partie et de l'autre nos auons fait mettre nostre seal en cels presentes lettres Ce est fait en l'an de grace M et CC et cinquante et cinc ou mois de nouembre