Charter Document - 05270040
| Charter Number: | 05270040 |
|---|---|
| Cartulary Title: | De la communauté entre époux en Bourgogne et Chartes de l'Abbaye de St Etienne de Dijon et 1250 à 1260. |
| Charter Language: | Latin |
| Charter Origin: | Lay |
| Charter Type(s): | Grant |
| Date: | 1254 |
| Date type: | Internal, A.D. |
| Resource Link(s): |
|
Charter:
In nomine Domini amen Ego Iohannes Sescallus miles Diuionensis bene compos mentis mee diem extreme messionis operibus misericordie preuenire et anime mee saluti prouidere cupiens pro ipsius anime mee et animarum antecessorum meorum remedio et salute dedi et concessi et do et concedo in puram et perpetuam elemosinam Deo et ecclesie Beati Stephani Diuionensis decem solidos Dyuionensis censuales peeterea elemosinam quam dominus Renaudus frater meus miles defunctus fecit Deo et ecclesie predicte Beati Stephani de decem solidis monete predicte nolens obliuioni dari ipsam in scriptis rogaui redigi et eandem laudo uolo et concedo et istos uiginti solidos tam ex mea quam dicti fratris mei elemosida assedi uiris uenerabilibus et religiosis abbati et conuentui predicte ecclesie percipiendos et habendos singulis annis in perpetuum de cetero in festo Natiuitatis beati Iohannis Baptiste ad conuentus predicti pitanciam super cameras omnes et super earum mansos et pertinentias sitas Dyuione in Castro ante Ulmum iuxta tenementum Bartholomei de Saumaise quod fuit a la Caynesse ex una parte et iuxta tenementum Iohannis de Fontanis quod fuit domini Huonis Monetarii militis ex altera uoloque et precipio ut quicunque dictas cameras cum mansis et pertinentiis earum tenebit de cetero predictos uiginti solidos annuatim conuentui Sancti Stephani predicto termino supradicto reddere teneatur et ad hoc eas cum mansis et pertinentiis earum et eas tenentes pro tempore dicto conuentui specialiter obligaui et nisi annuatim eodem termino soluti fuerint uolo ut dicti abbas et conuentus extunc auctoritate propria et sine clamore cuiuslibet curie dictarum camerarum et mansorum ac pertinentiarum intrent possessionem et dominium et eas teneant ex ipsisque fructus suos modis omnibus faciant quousque dicti uiginti solidi de quolibet anno quo soluti non fuerunt integre persoluantur Preterea quamdam eminam bladi quamdiu percepi apud Gemeaus confiteor esse dictorum abbatis et conuentus et eam quicto penitus eisdem Hec autem omnia ego Maria uxor dicti domini Iohannis laudo et rata et firma habeo et promitto in perpetuum habere prout superius sunt expressa In cuius rei testimonium nos Iohannes et Maria predicti presentibus litteris sigilla uirorum uenerabilium domini Mercatoris decani capelle Ducis et magistri Alberici decani Christianitatis Dyuionensis fecimus apponi Actum anno Domini MCC quinquagesimo quarto mense iunio