Charter Document - 05270030

Ie Iehanz cuens de Burgoine sires de Salins fais sauor a toz ces qui uerront cels letres que ge por lu remede de m'ame et de la ma foume et des ames a noz peres a noz meres et a noz ancesors ai done et outroie en pure aumonne et permaignable a l'yglisse de Saint Esteine de Diiom dex charges de sal a reciure et a paier au commandement de l'abe et dou couent de la deuandite eglise en nostre puis de Salins lu ior de la Sain Clemen et l'abes et li couenz sunt tenu touz iormais faire un aniuersaire chascon an por nos en tel meniere que a ma uie il sera faiz por mun pere et par ma mere et por ma foume et por noz ancessors et apres mun deces a tel ior sera faiz con ie partirai dou siegle et au paiement de caste aumonne faire ge en loy toz mes hoirs et mes bailliz et mes serianz que a ma uie ne apres moy terront ne garderont lu deuandit puis de Salins Ou tesmoing de laquel chose ge ai mis mun seel en cels lettres Ce fu fait en l'année nostre Seignur milleime doucenteimme cinquante douseime ou mois de septenbre