Charter Document - 05270029
| Charter Number: | 05270029 |
|---|---|
| Cartulary Title: | De la communauté entre époux en Bourgogne et Chartes de l'Abbaye de St Etienne de Dijon et 1250 à 1260. |
| Charter Language: | Latin |
| Charter Origin: | Lay |
| Charter Type(s): | Sale |
| Date: | 1252 |
| Date type: | Internal, A.D. |
| Resource Link(s): |
|
Charter:
In nomine Domini amen Ego Michael de Tenisseio cordubinarius et ego Euelina uxor eius confitemur et recognoscimus quod pro utilitate et necessitate nostra uendidimus et concessimus in hereditatem perpetuam Guillelmo de Burco clerico Dyuionensi stallum unum cum eius appendiciis situm Diuioni in Foro Ueteri iuxta stallum Cistercii ex una parte et iuxta stallum Hospitalis Diuitum Diuionensis ex altera de cuius uenditionis precio nos tenemus et habemus in numerata pecunia penitus pro pagatis et propter hoc de dicto stallo et eius appendiciis nos omnino deuestiuimus et dictum Guillelmum corporaliter inuestiuimus et tenemur ac promittimus sub obligatione bonorum nostrorum omnium et iuramento corporaliter pro nobis et nostris heredibus quos ad hoc obligamus prestito dictum stallum cum eius appendiciis garantire dicto Guillelmo et eius heredibus aut alii mandato ipsius perpetuo contra omnes et in nullo de cetero per nos uel per alios contraire Hac autem uenditione et omnibus supradictis completis retinuimus ac censa perpetua nobis et nostris heredibus predictum stallum cum eius appendiciis a predicto Guillelmo pro uiginti solidis monete Dyuionensis que curret pro tempore quos nos et heredes nostri predictum stallum cum eius pertinenciis tenentes pro tempore reddemus singulis annis inperpetuum de cetero predicto Guillelmo uel heredibus aut mandato ipsius in uigilia Resurrectionis Domini et ipsum stallum in bono statu tenere promittimus et tenemur Et nisi in uigilia Resurrectionis Domini annuatim fuerint dicti uiginti solidi persoluti uolumus et concedimus nos et nostros heredes et quoscumque alios dictum stallum cum eius appendiciis tenentes pro tempore teneri dicto Guillelmo et suis heredibus aut alii mandato ipsius ad emendam trium solidorum monete predicte et ut ipsi a dicta uigilia in antea auctoritate propria et sine reclamatione alicuius curie et absque meffacere intrent dicti stalli et appendiciarum ipsius possessionem et dominium inde fructus suos omnimode faciendo quousque dicti uiginti solidi cum emenda trium solidorum de quolibet anno quo soluti non fuerint eis integre persoluantur In premissorum igitur omnium testismonium presentibus litteris sigilla uirorum uenerabilium domini Mercatoris decani capelle Ducis et magistri Alberici decani Christianitatis Diuionensis fecimus apponi Actum anno Domini MCC quinquagesimo secundo mense iulio