Charter Document - 05270026

Ie Iehanz sires de Trichastel fais sauoir a touz cels qui uerront cels presentes lettres que comme ge demandasse giste sus les homes de Iz de l'iglise Saint Estiene de Diion apartenanz au priore de Saint Florent de Trichastel ie celui giste quit a touz iorz mais frainchement por moi et por mes hoirs et otroi a l'abé et au couent de Saint Estiene et au priore de Saint Florent de Trichastel que il lor deuant diz homes d'Iz tiengnent en teles franchises en teles seingnories en teles ioustises et en teles menieres come l'abes et li couenz de Saint Benigne de Diion tienent les lor homes en cele meisme uile de Iz sauf ce que li dit home qui apartienent au priore de Saint Florent de Trichastel ne me doiuent nulle chose por giste ne autres por els après ge otroi l'achat que li yglise de Saint Estiene et li priorez de Trichastel ont fait ou feront iusqu'a uint fauz de pre en la praerie de Cepoy et reconois que cil achaz est faiz par ma uolente Apres ge ai amoisoné a l'iglise Saint Estiene et au priore de sus nomez lou four qui est deuant lou donion deuant la maison Iehan dou Fosse a touz iorz mais por dis liures desteuenans a rendre chascun an touz iorz mais a moi et a mes hoirs l'andemain de Natiuite Nostre Seingnor et celui four il pent abatre dou tout et refaire toutes les foiz que il lor plaira ou tenir aues lou lor ne autre four ge ne mi hoir ne poons faire ou chastel ne en la uile de Trichastel fors celui que ge ai ou uiez Chastel et fors celui que ge ai en ma maison ou quel four de ma maison ge ne mi hoir ne deuons souffrir que nus cuie fors que por nos et por noz propres maisniées après ge otroi et lo la uendue et l'aumosne que Miloz de Bere damoiseaus a fait a Saint Estiene de Diion de quant que il auoit ou disme de Gemeaus et lor otroi que il puissent conquerre et tenir frainchement lou trait que mi home ont ou disme de Gemeaus Toutes cels choses ge otroi et confermai a touz iorz mais por moi et por mes hoirs et promet a bone foi que iamais n'irai encontre ne ne souffrerrai que autres i aut et por toutes cels choses l'abes de Saint Estiene m'ai done huit uinz liures d'esteuenans de que ge me tieng por paiez en deniers contanz Et ge Marie famme au deuant dit Jehan seingnor de Trichastel lo et uoil et otroi toutes cels choses si come eles sont diuisées desus et promet a bone foi que iamais n'irai encontre ne ne soufferrai que autres i aut Ou tesmoingnaige de toutes cels choses ge Iehanz sires de Trichastel ai mis mon seal en cels presentes lettres et ge Marie desus nomée por ce que ge n'ai seal ai prié et requis a henorable et religiox baron mon seingnor Poinz abbe de Bese que por moi mette son seal en tesmoingnaige en cels presentes lettres Ce est fait en l'an de grace M et CC et cinquante un ou mois de feurier