Charter Document - 05270014

Innocencius episcopus seruus seruorum Dei dilecto filio abbati Sancti Pauli Bisuntinensis salutem et apostolicam benedictionem Ex parte dilectorum filiorum abbatis et conuentus monasterii Sancti Stephani Diuionensis ordinis Sancti Augustini Lingonensis diocesis fuit propositum coram nobis quod nonnulli clerici et laici asserentes contra eos aliquid questionis habere aliquando canonicos interdum conuersos et nonnumquam animalia et alia bona ipsorum monasterii pretextu praue cuiusdam consuetudinis temeritate propria uadiare inuadere ac tamadiu detinere presumunt donec sit eis de huiusmodi questionibus iuxta ipsorum beneplacitum satisfactum quanquam in eos iurisdictionem non habeant qua hec possint ordinariam uel etiam delegatam Cum itaque iudicialis ordo ideo sit in medio constitutus ut nemo sibi audeat presumere ultionem et ob hoc id tanquam nullo iure subnixum non sit aliquatenus tolerandum nos uolentes eorum quieti consulere ac predictorum malitiis obuiare nostrarum litterarum auctoritate districtius duximus inhibendum ne quis occasione predicte consuetudinis ipsis memoratas inferre molestias ac bona predicti monasterii absque iuris ordine occupare uadiare inuadere seu quolibet modo detinere presumat Quocirca discretioni tue per apostolica scripta mandamus quatinus dictos abbatem et conuentum super hiis non permittas contra nostre inhibitionis tenorem ab aliquibus indebite molestari molestatores huiusmodi per censuram ecclesiasticam postposita appellatione compescendo Datum Lugduni nonis martii pontificatus nostri anno octauo