Charter Document - 05270008
| Charter Number: | 05270008 |
|---|---|
| Cartulary Title: | De la communauté entre époux en Bourgogne et Chartes de l'Abbaye de St Etienne de Dijon et 1250 à 1260. |
| Charter Language: | Latin |
| Charter Origin: | Religious |
| Charter Type(s): | Concession |
| Date: | 1250 - 1251 |
| Date type: | Internal, A.D. |
| Resource Link(s): |
|
Charter:
Uniuersis Christi fidelibus ad quos presentium noticia uenerit litterarum Bartholomeus de Saumaise burgensis Dyuionensis eternam in Domino salutem Cum ego iuste ac religiose cogitans quod sancta et salubris est cogitatio orare pro mortuis ut a peccatis soluantur si quem sibi de terrenis contagiis macule adheserunt supplicauerim humiliter et deuote uiris uenerabilibus et religiosis [] abbati et conuentui Sancti Stephani Dyuionensis quorum parrochianus existo quod mihi darent licentiam construendi altare in ecclesia eorum Beate Marie Dyuionensis a parte hospitalis eiusdem ecclesie in honore Beate Marie Magdalene ut cum propheta possim psallere Domine dilexi decorem domus tue in quo uidelicet altari missa pro defunctis celebrabitur et specialiter pro Iohannetta uxore mea defuncta pro me et liberis meis quos de corpore proprio recepi uel recipiam in futurum et pro patre meo et matre mea et ipsi attendentes deuotionem meam et propositum meum laudabile et honestum unanimiter et concorditer concesserint mihi postulata deuote uolentes et concedentes ut postquam ecclesia predicta consecrata fuerit liceat mihi ossa predicte uxoris mee transferre et quoram altari predicto ecclesiastice tradere sepulture et hoc ad humationem meam et liberorum meorum mihi concesserint ita quod post quindecim dies post quos dictam uxorem meam uel me uel aliquem liberorum meorum in loco predicto sepeliri contigerit in loco illo extollamentum nullum fiat sed ad equalitatem pauimenti dicte ecclesie terra et lapides desuper positi modis omnibus reducentur pretereaque promiserunt dicti abbas et conuentus missam predictam per canonicum presbiterum uel per secularem presbiterum ydoneum celebrari imperpetuum ad altare predictum bona fide se et successores eorum ad hoc imperpetuum obligantes ego considerans et attendens istam gratiam mihi liberaliter esse factam et quod qui altari seruit de altario debet non immerito sustentari obtuli deuote dedi tradidi et concessi ad sustentationem presbiteri qui in altari predicto celebrabit diuina pro anima uxoris mee predicte et mea et liberorum meorum et patris mei et matris mee et omnium fidelium prout expressum est superius domum meam quam acquisiui titulo legitime emptionis cum manso et appendiciis ipsius sitam Dyuioni in uico de la Selerie iuxta domum domini Ebrardi dicti Diuitis militis ex una parte et iuxta domum Odonis Diuitis ex altera et de ipsa domo et de manso et omnibus appendiciis ipsius ego me penitus deuestiens dictos abbatem et conuentum corporaliter inuestiui Teneorque et promitto per sacramentum meum corporaliter prestitum dictam domum cum manso et omnibus appendiciis ipsius garantire dictis abbati et conuentui et eorum successoribus perpetuo contra omnes in nullo de cetero per me uel per alium contraire ad quam garantiam sicut premissum est portandam me et meos heredes omnes presentes et futuros et omnia bona mea et heredum meorum presentia et futura quecumque et ubicumque sint eisdem abbati et conuentui et eorum successoribus imperpetuum obligaui In premissorum igitur omnium auctoritatem testimonium et munimen presentibus litteris sigilla uirorum uenerabilium domini Stephani abbatis Sancti Benigni et domini Mercatoris decani capelle Ducis Dyuionensis feci et supplicaui apponi Acta sunt hec anno Domini MCC quinquagesimo mense iannuario