Charter Document - 05270004

Ge Alays duchesse mère lou Duc de Bourgoingne et ge Aruiers de Nuiz cheualiex et commandemanz lou duc deuant dit facons sauoir at ouz cels qui uerront cels presentes lettres que comme descorde fust entre l'abé et lou couuent de Saint Estiene de Diion d'une part et Huot damoiseau de Cuntigné d'autre part sur un cheffaut que cil Huoz auoit leué a Cuntigné et sur un pont leueiz et sur lou fossé que cil Huoz facoiz ici meismes desquex choses l'abés et li conuent desus nomé li aloient encontre et disoient que il ne les i pooit ne deuoit faire en la fin les parties se mistrent de cels choses sur nos par bone uolente et nos par escort auons dit nostre dit en tel menière que nos uoulons que li cheffauz et li ponz leueiz et li fossez soient en souffrance en tel estat comme il sont au ior que li mise fu faite sauf ce que il puet lou cheffaut clorre et courir sanz plus autrement efforcier et issi celui cheffaut et lou pont et lou fossé maintenir et puet encor cil Huoz clorre sa maison de soif sanz cheuiller en tel manière remainent issi cels choses iusque a la uenue lou Duc et se quant li Dux sera uenuz ou se il ne reuenoit qui n'auiegne l'abés et li couuenz requeroient lor droit de cels choses desus nomées et li Dux ou ses oirs qui seroit dux se il ne reuenoit dont Dex lou gart ueoient par droit selonc les raisons et les chartres l'abé et lou couuent desus nomez que les choses desus nomées doient estre abatues l'on les abatraa adonc et se li corz lou Duc meismes uoit que les choses deuant dites i doient remanoir et que cil Huoz les i doit auoir et plus faire il les i aura et sa uolenté y fera dou plus ces choses sont faites et deuisées par l'escort des parties sauues les chartres et les priuilèges et les raisons des parties et que eles soient estables nos auons mis en cels presentes lettres noz seaus Ce est fait en l'an de l'incarnation Nostre Segnor MCC et cinquante ou mois d'Outouure