Charter Document - 05250073
| Charter Number: | 05250073 |
|---|---|
| Cartulary Title: | Les foires et marchés à Dijon, essai d'histoire économique et chartes de l'abbaye de Saint-Etienne de Dijon de 1200 à 1230. |
| Charter Language: | Latin |
| Charter Origin: | Lay |
| Charter Type(s): | Confirmation |
| Date: | 1227 |
| Date type: | Internal, A.D. |
| Resource Link(s): |
|
Charter:
Ego Alydis ducissa Burgundie notum facio omnibus presentem paginam inspecturis quod nobilis vir Willermus frater meus dominus Mirabelli pro remedio anime sue laude et assensu uxoris sue Clemencie et filiorum suorum videlicet Huonis et Henrici in perpetuam dedit et concessit elemosinam Deo et ecclesie sancti Stephani diuionensis omnes tertias quas habebat in toto territorio seu in adiacenti finagio Mirabelli eidem ecclesie post decessum suum pacifice possidendas et habendas ita videlicet quod de omnibus prefatis tertiis ipsam ecclesiam inuestiuit Et pater abbas et conuentus dicte ecclesie fructus earumdem tertiarum eidem domino concesserunt ad vitam suam tantum percipiendos et tenendos predicti vero abbas et conuentus dederunt et concesserunt eidem domino medietatem fructuum decimarum suarum de Mirabello ad vitam suam tantum possidendam et habendam retento sibi iure et dominio admodiandi decimas supradictas Post decessum vero ipsius domini tam medietas dictarum decimarum quam tertie prenotate ad ipsam ecclesiam sancti Stephani diuionensis libere et absque contradictione aliqua reuertentur Ita tamen quod occasione alicuius debiti contracti iam uel contrahendi cum successoribus abbatis supradicti vel conuentus seu forefacti vel occasione aliqua que posset Iam dictis abbati uel conuenti Ascribi tam decime prefate quam tertie prenotate non poterunt a supradicto domino vel heredibus suis seu hominibus suis detineri tempore vero quo admodiare voluerit Iam dictus abbas decimas prenotatas denuntiare faciet In ecclesia Mirabelli et quicumque plus dare voluerit de decimis supradictis infra octo dies denunciationis facta sufficienti securitate accipiat alioquin ipse abbas cui voluerit admodiabit saluo tamen iure minute decime que ab antique ad prioratum Mirabelli noscitur pertinere Preterea idem dominus Mirabelli faciet computari decimam in hospitiis Mirabelli et persolui et etiam de omnibus essaltis et terris ne nouo ad culturam redactis uel etiam in posterum redigendis Predicta vero decima in horrea dicti prioratus reportabitur cuius stramen ibidem manebit in usus ipsius priorato Has vero pactiones et donationes sepe dictus dominus Mirabelli et uxor ipsius Clementia et filii sui videlicet Huo et Henricus iurauerunt se seruare imperpetuum et tenere si etiam ipse dominus [quod absit] ab his pactionibus resiliret et infra xl dies post ammonitionem abbati supra dicto competenter non satisfaceret tam dicte decime quam tertie ad ecclesiam sancti Stephani diuionensis libere reuerterentur Et ut hoc ratum et inconcussum imposterum habeatur ad petitionem utriusque partis sigilli mei munimine presentem paginam roboraui Actum est anno Domini MCC vicesimo septimo