Charter Document - 05250038

Notum sit omnibus ad quos presentium uenerit noticia litterarum quod dissensio que uertebatur inter abbatem et conuentum sancti Stephani dyuionensis ex una parte et canonicos capelle ducis dyuionensis ex altera super integritate prebende predicte capelle quam petebat ecclesia sancti Stephani In hunc modum pacificata est et sopita et ad concordiam reuocata ecclesia sancti Stephani unam prebendam integram habebit in capella ducis quod ipsa ecclesia percipiet eodem modo quo et canonici residentes et deseruientes in eadem capella et deseruiet eam per canonicum regularem ydoneum et sacerdotem Preterea si aliquis canonicorum predicte capelle de hac luce migrauerit ecclesia sancti Stephani fructum prebende illius canonici defuncti post mortem ipsius canonici per unum annum integraliter habebit si ille canonicus prebendam uel partem prebende aliquando reeeperit nomine prebende uel si ratione infirmitatis ad aliquem religionem transierit et de illa infirmitate moriatur Elapso anno prebenda redibit ad capellam si uero aliquis canonicorum prebende sue alio modo renuntiauerit ecclesia sancti Stephani fructum illius prebende propter hoc non habebit Tamen si ratione infirmitatis renunciauerit et non conualuerit eam habebit si conualuerit non habebit Ideoque pia consideratione statutum fuit ut ecclesia sancti Stephani pro singulis defunctis canonicis capelle ducis plenarium faciat obsequium omni tempore tanquam pro uno ex suis et canonici capelle pro canonicis sancti Stephani faciant similiter capella non habebit cismiterium nec parochiatum preterquam ducis et ducisse quorum curam habet auctoritate domini Pape decanus predicte capelle set et canonici capelle non poterunt aliam religionem uel ordinem in capella statuere nisi de ecclesia sancti Stephani et si quis eorum pauper uel diues apud sanctum Stephanum habitum religionis uoluerit assumere non negabitur ei set uoluntarie ibi suscipietur domus proprie canonicorum capelle in quibus morantur et officine capelle non erunt censuales nec cellaria nec coquine nec grangie relique uero erunt censuales uinee quoque capelle de Generali tam a censu quam a decimis erunt libere set proprie canonicorum uinee censum absque decimis dabunt Abbas uero et canonici sancti Stephani decanus et canonici capelle fidelitatem sibi inuicem fecerunt et hanc fidelitatem et hanc compositionem bona fide tenendam et obseruandam iuramento interposito firmauerunt Abbas uero et canonici sancti Stephani decanus et canonici capelle qui sustituentur ad compositionem et fidelitatem supradictam tenendam et obseruandam iuramento obligabunt Et si decanus uel aliquis canonicorum capelle iurare noluerit infra octo dies postquam requisitus fuerit ab abbate sancti Stephani prebendam suam non recipiet in capella antequam iuraverit Similiter si abbas uel aliquis canonicorum sancti Stephani hoc idem facere noluerit infra octo dies postquam requisitus fuerit a decano capelle prebendam non recipiet in ecclesia sancti Stephani nec communionem fratrum habebit antequam iurauerit Similiter si abbas uel aliquis canonicorum sancti Stephani qui de cetero sustituentur iuramentum istud facere noluerit infra octo dies postquam requisitus fuerit a decano canonici sancti Stephani non habebunt eum pro abbate nec abbas canonicum habebit pro canonico donec iurauerit similiter si decanus uel aliquis canonicorum capelle qui de nouo sustituentur illud iuramentum facere noluerit infra octo dies postquam requisitus fuerit ab abbate decanus non habebitur pro decano a canonicis suis nec canonicus pro canonico a decano suo donec iurauerit Abbas uero et canonici sancti Stephani istam fidelitatem iurabunt in capella ducis Decanus uero et canonici capelle iurabunt eam in ecclesia sancti Stephani secundum predicta requisti Odo autem dux Burgundie hanc compositionem laudauit et ad petitionem utriusque partis manutenere promisit et quod eam faciet fideliter obseruarj In cuius rei testimonium presenti scripto sigillum suum apposuit Abbas et conuentus sancti Stephani decanus et capitulum capelle ut hoc ratum in posterum habetur sua sigilla similiter presenti scripto apposuerunt Actum anno gratie MCC septimo decimo mense maio