Charter Document - 05210004
| Charter Number: | 05210004 |
|---|---|
| Cartulary Title: | Les origines de l'hypothèque en Bourgogne et chartes de l'abbaye de Saint-Etienne, des VIIIe, IXe, Xe et XIe siècles |
| Charter Language: | Latin |
| Charter Origin: | Royal |
| Charter Type(s): | Decree |
| Date: | 0869 |
| Date type: | Internal, Calendar, Regnal |
| Resource Link(s): |
|
Charter:
In nomine sancte et individue Trinitatis Karolus gratia Dei rex Si servorum Dei iustis et racionabilibus efflagitationibus quas pro Ecclesiarum sibi commissarum utilitatibus nobis intimaverint assensum prebemus et eas ad effectum perpetue stabilitatis perducere satagimus non solum in hoc regiam exercemus consuetudinem sed et iam hoc ipsum ad presentem vitam cum felicitate transigendam et ad futuram quamtocius beatitudinem capessendam nobis profuturum esse non dubitamus Quapropter comperiat omnium fidelium sancte Dei Ecclesie nostrorumque tam presentum quam futurorum sollertia qualiter carissimus nobis Isaac Linguonensis Ecclesie reverendus antistes ad nostram se colligens maiestatem humiliter postulavit quatinus pro nostra pietate Ecclesie sancti Manmetis Linguonensis atque Ecclesie sancti Stephani Divionensis quibus Deo ordinante ipse preerat monetam quam antea habere non consueverant concederemus Simili modo et iam deprecatus est de mercatis in sua potestate constitutis in Linguonis scilicet et in Divione de quibus talis antiquitus consuetudo fuit ut medietas de annalibus et de ebdomadi in Linguonis partibus predictarum Ecclesiarum cederetur et de ebdomadi in Divione summa integritas iam dicte potestati constitueretur tale auctoritatis nostre preceptum sepe fatas Ecclesias relinqueremus per quod ipse eiusque successores sine aliqua contradictione tenere racionabiliter possent Cuius laudabilibus peticionibus atque ammonicionibus aurem accomodantes hoc sublimitatis nostre preceptum fieri atque dare iussimus per quod ipse venerabilis antistes eiusque successores et prefatas monetas et de mercatis quemadmodum supra habetur insertum quieto ordine et in stabilitate obtinere imperpetuum valerent Et ne nostra concessio ex iam dictis monetis a falsis monetariis comitumque ministris aliquo violari potuisset ingenio iccirco non ad ius comitum sed ad utilitatem iam predictarum Ecclesiarum earumque rectoris provisionem volumus pertinere Ut autem hec nostre confirmacionis seu permissionis auctoritas firma et inconvulsa omni tempore perseveret atque stabilis in futurum permaneat manu propria solemniter firmavimus et de anulo nostro sigillari iussimus Signum Karoli gloriosissismi regis Audacer notarius ad vicem Gaudeni recognovi et subscripsi Data duodecimo Kalendas septembris Indictione II anno XXVIIII regnante Karolo gloriosissimo rege Actum Pontiliaco palatio regis in Dei nomen feliciter