Charter Document - 05200037

A touz ceus qui ces presentes lettres verront frere Jehan aumosnier de l'eglise de Saint Denys en France et garde du seel de la prevosté de Saint Denys saluz Nous faisons asavoir que par devant nous vindrent en jugement Hemeri Menuet de Pierrefitte et Aceline sa fame et recognurent en droit par devant nous eus avoir vendu et quittié en non de pure vente a touz jours mes pardurablement a religieus homme misire Renaut du Temple cenier de Saint Denys et a ses successeurs pour nuef livres de parisis qu'il ont euz et receuz en deniers nombrez dudit cenier si comme il disoient et dont il se tindrent pour paiez enterinement une piece de vigne si comme ele se comporte assise ou terrooir de Villenueve tenant d'une part audit cenier et a Renaut le Clerc de Pierrefitte d'autre en la censive dudit cenier a nuef deniers parisis de chief cens renduz chascun an es huiteves Saint Denys tant seulement si comme il disoient Et promidrent lidiz vendeur par leurs creans par devant nous que contre ceste vente et ceste quittance fete par devant nous par droit de heritage par reson de conquest de don en aumosne de promesse pour noces de doaire ne par nul autre droit commun ou especial reson ou cause quiex que il soient par eus ne par autres ne vendront ne ne pourchaceront a fere venir des ores en avant mes ladite vente ausdiz religieus et a ses successeurs garantiront delivreront et defendront aus us et aus coustumes de France en jugement et dehors toutes [] foiz que mestiers en sera contre touz si comme il disoient Et quant a ce tenir fermement et a acomplir il ont obligié et sousmis eus et leurs biens muebles et non muebles quiex que il soient presenz et avenir a jouticier par mon seigenur l'abbé de Seint Denys ou par son commandement Et en tesmoing de ce nous avonz mis le seel de la prevosté de Seint Denys a ces presentes letres l'an de grace mil deus cens quatre vinz et quatre ou mois de decembre