Charter Document - 05200036

A touz ceuz qui ces lettres verront Guy du Mes garde de la prevosté de Paris salut Nous fesons asavoir que par devant nous vindrent Pierre du Celier et Perronnele sa fame affermerent que il avoient tenoient et poursuioient de l'eritage dudit Pierre demi arpent de vigne assise ou terroir de Perrefrite tenant d'une part et d'autre a religieus hommes li abbés et le couvent de Saint Denys en France charchié tant seulement en sis deniers parisis de cens en la censive du cenier de Saint Denys desus dit lequel demi arpent desus dit lesdiz Pierre et Perronnele sa fame recognurent en droit par devant nous euz avoir venduz et en non de pure vente quitiez et otroiez perpetuelment a touz jours au devant diz religieus li abbés et le couvent desus diz et a leur successeurs pour huit livres parisis qu'il ont ja euz et receus desdiz acheteurs et dont il se tindrent bien a paiez par devant nous Et promidrent par devant nous et par leur loiaus creans lesdiz vendeurs chascuns pour le tout et sans division que eus contre la vente desus dite par reson d'eritage de conquest de douaire de don fait pour noces ne par nul autre droit quel que il soit commun ou especial n'iront ne aller ne feront par eus ne par autres a nul jour ou temps avenir ainçois ausdiz acheteurs et a leur successeurs le demi arpent de vigne dessus dit si comme il se comporte du lonc et du lé au cens desus dit sanz autre charge quite et delivre de touz empeschemenz et obligations garandiront deliverront et deffendront en jugement et hors jugement toutes foiz que mestiers en sera a leur couz et proprens despens contre touz et envers touz aus us et aus coustumes de France Et quant a ce tenir fermement et acomplir et touz empeschemenz et obligations oter se nul en i avoit et les couz et les damages que lesdiz religieus pourroient avoir par defaute de garandie rendre et paier se nul en i avoit lesdiz vendeurs ont obligié especialment et souzmis eus leurs hoirs leurs biens et de leur hoirs muebles et non muebles presens et avenir ou que il soient a jousticier au prevost de Paris ou en quel juridition il seront trouvez renunçanz en ce fait a tout previlege de crois prise ou a prendre au benefice de division a l'eception de ladite pecune non bailliee non contee et non mie numbree a touz engins a toutes decevances et a tout ce que il porroient dire contre ceste lettre En tesmoing de ce nous avons mis en ces lettres le seel de la prevosté de Paris l'an de grace mil deuz cens quatre vins ou mois de mars le mardi devant la mi quaresme