Charter Document - 05200034

A touz ceus qui ces lettres verront frere Estienes aumosniers de Saint Denys en France et garde du seel de la prevosté de Saint Denys saluz Nous faison asavoir que par devant nous vindrent Jehans le Pouhier et Hersent sa fame Lorenz Gaubert et Marie sa fame de Pierre Fitte et recognurent en droit par devant nous que il avoient vendu a touz jours et quittié perpetuelment a religieus homme et honeste a frere Gile Espiart cenier en ice temps de Saint Denys pour treze livres de parisis lesquez il ont euz et receuz en deniers contés de l'acheteur devant dit si comme il disoient et desquez il se tindrent pour paiez enterinement par devant nous une masure si comme elle se comporte en lonc et en lé assise a Pierre Frite en la rue Garout si comme il disoient tenant au pressoir au cenier devant dit d'une part et d'autre part a la masure Hemeri Morant chargiee d'un minot d'aveinne de rente a rendre chaschun an audit cenier ou a son commandement a feste saint Remi si comme il disoient Et promistrent lidiz vendeur par leur loial creans par devant nous que contre ceste vente et ceste quictance par droit d'eritage par reson de conquest ne par nul autre droit reson ou cause par eus ne par autres ne vendront des ore en avant ne pouchaceront a faire venir et que la masure si comme elle se comporte garantiront delivreront et deffendront aus us et aus coustumes de France contre touz au devant dit acheteur et a ses successeurs toutes foiz que mestiers en sera ensurquetout que il rendront audit acheteur et a ses successeurs par non de peinne quarente et huit soulz de parisis se la vente estoit retraite en tout ou en partie Et quant a ce tenir fermement li vendeur desus nommez souzmidrent et abandonnerent par leur loiaus creans par devant nous euz et touz leurs biens muebles et non muebles quez que il soient presenz ou a venir a justicier par monseigneur l'abbé de Saint Denys ou par son commandement En tesmoing de laquele chose nous a la requeste des vendeurs meismes a ceste lettre le seel de la prevosté de Saint Denys l'an de l'Incarnation mil et deuz cenz soissante et douze ou mois de janvier le mardi prochien aprés la Thiefainne