Charter Document - 05200033

A touz ceus qui ces lettres verront Gui du Mes garde de la prevosté de Paris salut Nous faisons asavoir que par devant nous vint Ligier de Biauvés fiz feu Rogier de Biauvés et recognut en droit que il avoit vendu et quittié a touz jours des ores en avant perpetuelment et enterinablement sanz esperance de jamés riens rapeler a monseigneur l'abbé de Saint Denys en France et au couvent de ce meisme lieu un quartier et VII quarriaus de vigne que il avoit si comme il disoit seans ou clos de la Barre a Pierre Frite tenant de toutes pars aus vignes du clos du devant dit abbé et couvent ou lieu devant dit en la censive monseigneur saint Denyse a trois deniers et poitevine de cens chacun an rendus a la feste monseigneur saint Denyse au seigneur de l'eglyse monseigneur saint Denyse si comme il disoit pour nuef livres de parisis suens quites qu'il a euz et receuz en deniers ses contés et nombrez et s'en tint bien a paiez par devant nous et a renoncié par devant nous a ce qu'il ne puisse dire qu'il n'ait euz et receuz lesdiz deniers bien contés et bien nombrez Et promist par devant nous et par son loial creant le devant dit Ligier que il encontre la vente et la quittance desus dite par reson d'eritage d'eschange de escheoite ne par nul autre droit quel que il soit commun ou espetial n'ira ne aler ne fera par lui ne par autre a nul jour des ores en avant et que il la devant dite vente au devant dit monseigneur l'abbé et le couvent devant dit ou a ceus qui cause auront de eus des ores en avant a touz jours garantira delivrera et deffendra a ses propres cous et despens contre touz en jugement et hors jugement aus us et aus coustumes de France toutes foiz que besoinz et mestiers en sera et qu'il en sera requis Et quant a ce tenir fermement ledit Ligier a obligié et souzmis lui et touz ses biens muebles et non muebles presens et avenir ou que il soient a justicier a nous et a nos successeurs En tesmoing de ce nous avons mis en ces lettres le seel de la prevosté de Paris l'an de grace MCC soissante et dis et sept ou mois de jenvier