Charter Document - 05200032

A touz ceus qui ces lettres verront Renaut Barbou garde de la prevosté de Paris salut Nous fesons asavoir que par devant nous vindrent Jehan le Concierge de Seint Denys et Marguerite sa fame et requenurent en droit qu'il avoient vendu et quité a touz jors a religieus homes et honestes a l'abbé et au couvent de Seint Denys en France un clos de vigne que il avoient de l'eritage de celui Jehan a Pierre Frite tenant d'une part au clos Seint Denys et d'autre part a la vigne Oudin Bobelin et une piece de pré que il avoient si come il disoient entre Seint Denys et Seint Legier tenant d'une part au poncel de Seint Legier et d'autre part aus prez Seint Denys et tele partie comme il avoient et prenoient chascun an ou cens qui estoit aus devant diz vendeeurs et aus devant diz achateurs moitoien en la Meson Dieu aus huitieves de la Seint Denys tout mouvant du fié et de la seigneurie aus devant diz abbé et couvent si come il disoient pour deus cenz livres de parisis qu'il ont euz et receuz leur quites en pecune numbree des devant diz achateeurs si come il disoient et dont il se tindrent a paiez par devant nous et en quiterent les devant diz acheteeurs a touz jors en renunçant a l'exception de ladite pecune non eue non receue non bailliee et non delivree du tout en tout Et promistrent les devant diz vendeurs par devant nous et par leur loiaus creanz que eus encontre ladite vente et ladite quitance par droit d'eritage d'eschaoite de conquest de doaire de don pour noces ne par nul autre droit quel que il soit commun ou especial n'iront ne aler ne feront en nule maniere que ce soit a nul jor ou tens avenir ençois aus devant diz achateeur la devant dite vente garandirunt delivreront et defendront en jugement et hors jugement contre touz toutes les foiz que mestier leur en sera aus us et aus coustumes de France si comme il le requenurent par devant nous Et transportent des or en droit et a touz jors es devant diz achateeurs tout le droit l'action la proprieté la seigneurie la possession que il avoient ou pooient avoir par quelconques droit que ce soit en toute la vente desus dite sanz riens reclamer i james sanz riens reclamer i jamesa nul droit ne nule chose a nul jor et sanz riens retenir a eus Et quant a ce tenir fermement les devant diz vendeeurs ont obligié et soumis chascuns pour le tout eus et leur hoirs touz leur biens et les biens de leur hoirs muebles et non muebles presenz et avenir ou qu'il soient a justicier a nous ou a noz successeurs en renunçant a ce qu'il ne puissent dire eus avoir esté deceuz en ceste vente fere en pou ne en auques ne outre la moitié du droit pris et a toutes les resons qui porroient estre mises encontre ceste lettre En tesmoing de ce nous avons mis en ceste lettre le seel de la prevosté de Paris l'an de l'Incarnation Nostre Seigneur mil CC soissante et quatorze ou mois de marz le jeudi aprés la feste Nostre Dame