Charter Document - 05200028
| Charter Number: | 05200028 |
|---|---|
| Cartulary Title: | Le cartulaire blanc de Saint-Denis: Chapitre de Pierrefitte [Paris] |
| Charter Language: | Latin |
| Charter Origin: | Religious |
| Charter Type(s): | Sale |
| Date: | 1234 |
| Date type: | Internal, A.D. |
| Resource Link(s): |
|
Charter:
Omnibus presentes litteras inspecturis [] officialis curie Parisiensis salutem in Domino Notum facimus quod dominus Johannes Lovelli miles in nostra presentia constitutus recognovit se vendidisse Guiberto quondam presbitero de Petra Fixa quandam peciam vinee in territorio de Petra Fixa sitam ut dicitur juxta vineam Sancti Dyonisii in censiva ejusdem sancti pro viginti libris parisiensium promittens fide media quod contra vendicionem istam per se vel per alium non veniet in futurum et quod dictam vineam predicto presbitero et eis qui causam ab ipso habebunt ad usus et consuetudines Francie garantizabit contra omnes Et de recta garantia ferenda dictus miles sex arpenta terre sita ut dicitur insimul inter Edictum et Montem Martyrum in censiva caritatum Beati Dyonisii in contraplegium dicto presbitero obligavit et eis qui causam ab eo habebunt Preterea dictus Guibertus presbiter in nostra presencia constitutus recognovit se dictam vineam dedisse et concessisse Johanni de Espinoi clerico cognato suo in puram et perpetuam elemosinam post decessum dicti presbiteri pacifice possidendam ita tamen quod dictus clericus dictam vineam non poterit vendere nec alienare quamdiu vixerit sed post decessum ipsius clerici ad manum viri religiosi abbatis Sancti Dyonisii libere revertetur Promisitque dictus presbiter quod contra donationem seu ordinationem istam per se vel per alium venire nullatenus attemptabit Datum anno Domini MCCXXX tertio mense januario