Charter Document - 05200021
| Charter Number: | 05200021 |
|---|---|
| Cartulary Title: | Le cartulaire blanc de Saint-Denis: Chapitre de Pierrefitte [Paris] |
| Charter Language: | Latin |
| Charter Origin: | Religious |
| Charter Type(s): | Lease |
| Date: | 1246 |
| Date type: | Internal, A.D. |
| Resource Link(s): |
Chapitre de Pierrefitte 21 |
Charter:
Universis presentes litteras inspecturis officialis curie Parisiensis salutem in Domino Notum facimus quod in nostra presencia constituti Guillelmus dictus Comes et Johannes gener Gileberti dicti Comitis de Petra Frita recognoverunt se recepisse ad incrementum census pro se et heredibus suis a venerabilibus viris et religiosis [] abbate et conventu ecclesie Beati Dyonisii in Francia quamdam peciam vinee quam habebat eadem ecclesia ut dicitur apud Petram Frictam in Campo Renardi moventem ut dicitur a se ipsa contiguam vinee Andree Quadrifabri ut dicitur circiter unum arpentum et VI quarellos ut dicitur continentem pro quadraginta solidis parisiensium singulis annis ab ipsis Guillelmo et Johanne et eorum heredibus imperpetuum eidem ecclesie vel ejus mandato apud Beatum Dyonisium in eadem ecclesia in duobus terminis decetero persolvendis medietate videlicet in octabis Beati Martini hyemalis et alia medietate in octabis Pasche Domini sic ab eisdem Guillelmo et Johanne et eorum heredibus tenendam et excolendam imperpetuum decetero atque pacifice ut asseruerunt possidendam Tenentur autem et promiserunt coram nobis idem Guillelmus et Johannes pro se et heredibus ponere in emendationem platee dicte vinee scilicet in edificationem infra IIII annos usque ad C solidos parisiensium ad laudationem thesaurarii ejusdem ecclesie et per ipsum Que omnia premissa promiserunt iidem Guillelmus et Johannes fide data in manu nostra se fideliter imperpetuum facturos ac firmiter servaturos quantum ad hoc heredes suos relinquentes eidem ecclesie specialiter obligatos quantum in eis est quilibet ipsorum scilicet pro sua medietate pecie vinee supradicte De quibus omnibus sic firmiter ab ipsis Guillelmo et Johanne et eorumdem heredibus adimplendis et tenendis imperpetuum decetero ac fideliter observandis dictus Guillelmus pro se et heredibus suis pro portione sua pecie vinee predicte assignavit eamdem ecclesiam ad unum quarterium et dimidium vinee proprium ipsius Guillelmi ut dicitur contiguum pecie vinee predicte ut dicitur movens ab eadem ecclesia ut dicitur et dictus Johannes similiter pro se et heredibus suis pro sua alia medietate ejusdem pecie unum quarterium et dimidium vinee proprium Hersendis uxoris sue ut dicitur sicut ipsa asseruit coram nobis situm ex alia parte vie contigue pecie vinee predicte movens similiter ab eadem ecclesia ut dicitur ita quod si dictus Guillelmus et Johannes aut eorum heredes aut alter ipsorum Guillelmi et Johannis vel ejus heredes deficerent in aliquo de premissis statim ipsa ecclesia posset eandem vineam ad augmentationem census traditam vel partem deficientis cum assignamento ab eo facto in manu sua capere et saisire et gaudere et exinde proventus percipere quousque de areragiis et de toto defectu esset eidem ecclesie plenarie satisfactum Que omnia voluerunt laudaverunt et approbaverunt coram nobis Dyonisia uxor Guillelmi et Hersendis uxor dicti Johannis promittentes hec predicta fide data ab eisdem in manu nostra se firmiter imperpetuum facturas et fideliter servaturas et aliqua ratione decetero contra hec per se vel per alios non venturas cum predictis maritis suis similiter heredes suos relinquentes quantum in eis est et etiam quantum ad hec omnia eidem ecclesie specialiter obligatos In cujus rei memoriam et testimonium ad petitionem dictorum Guillelmi et Johannis et suarum uxorum presentibus litteris sigillum curie Parisiensis duximus apponendum Actum anno Domini MCCXLVI mense junio