Charter Document - 05199643
Charter Number: | 05199643 |
---|---|
Cartulary Title: | Coventry and Lichfield 1258-1295 Volume 44 |
Charter Language: | Latin |
Charter Origin: | Religious |
Charter Type(s): | Mandate |
Date: | 1289 |
Date type: | Internal, A.D., Calendar, Papal |
Resource Link(s): |
Reference Document for this Embedded Document |
Charter:
Nicholaus episcopus servus servorum Dei dilectis filiis abbati et conventui monasterii loci benedicti de Stanl Cisterciensis ordinis Coventr et Lich dioecesis salutem et apostolicam benedictionem Ordinis vestri sacra religio sub qua virtutum domino gratum iugiter impenditis famulatum necnon dilecti filii nobilis viri Henrici de Lacy comitis Lincoln qui pro vobis devotas per suas litteras nobis supplicationes porrexit consideratio nos inducunt ut votis vestris in hiis favorabiliter quantum cum Deo possumus annuamus que vobis fore dinoscimus oportuna Sane petitio vestra nobis exhibita continebat quod locus qui dicitur locus benedictus de Stanl Coventr et Lich dioecesis in quo monasterium vestrum situm est per inundationes maris iuxta quod monasterium ipsum consistit adeo concutitur et aquis nimiis irrigatur que interdum in dicti monasterii officinis usque ad trium pedum altitudinem colliguntur quod persone degentes in ipso non possunt ibidem absque gravi rerum et corporum periculo remanere Terra quoque sive possessiones dicti monasterii circa illud consistentes occasione dictarum inundationum terre et possessionum superficiem occupantium adeo sunt destructe quod advenientibus ad monasterium sive recedentibus ab eodem securus transitus patere non potest Propter quod verisimiliter formidatur quod prefatum monasterium in loco ipso adversus talem destructionem que sibi ex fluctuationibus dicti maris imminet diu subsistere non valebit Hec igitur venerabilis frater noster Coventr et Lich episcopus loci dioecesanus diligenter attendens vobis licentiam auctoritate ordinaria tribuit vos ad alium locum quem dictus comes vobis opportunum viderit transferendi Idem quoque comes monasterii predicti patronus cupiens ad locum ubi ecclesia de Whall dioecesis supradicte consistit qui habitationi vestre admodum est accommodus vos transferri ius patronatus et quicquid iuris in ipsa ecclesia obtinebat vobis ea intentione pia et provida liberalitate concessit quod de proventibus vobis ratione huius concessionis licite proventuras viginti monachi ultra monachorum numerum in dicto monasterio solitum observari in vestro assumendi collegio congruam sustentationem haberent ad quod proventus ipsi dicuntur sufficere competenter et quod iidem viginti monachi pro nostra et predecessorum ac successorum nostrorum dictique comitis animabus devotas orationes altissimo effundere tenerentur Bona insuper dicti monasterii fere omnia sicut asseritis prope ecclesiam predictam consistunt Vos autem premissa sollicite attendentes ac per hoc affectantes ad locum predictum ubi ecclesia prefata sita est transire et inibi virtutum domino perpetuum impendere famulatum et in prefato monasterio in quo nunc degitis per quatuor monachos in sacerdotio constitutos continue facere deservivi a nobis suppliciter petiistis ut vobis specialem gratiam facere per quam vestrum in hac parte desiderium valeat adimpleri paterna diligentia dignaremur Nos igitur vestris et prefati comitis supplicationibus grato concurrentes assensu predictam ecclesiam cum omnibus capellis iuribus et pertinentiis suis vobis auctoritate apostolica in usus proprios concedimus a vobis vestrisque successoribus in usus ipsos perpetuo retinendam ita quod cedente vel decedente ipsius ecclesie rectore possessionem eius apprehendere auctoritate propria valeatis alicuius assensu minime requisito vobisque transferendi vos ad locum predictum in quo ecclesia prefata consistit sine iuris preiudicio alieni ac ibidem sub predicti ordinis observantia inperpetuum remanendi eadem auctoritate licentiam elargimur et quod ipsius ecclesie fructus redditus et proventus in usus possitis convertere supradictos reservata tamen ex eis vicario perpetuo in eadem ecclesia servituro et ad presentationem vestram per eundem dioecesanum in ipsa ecclesia instituendo congrua portione ex qua commode sustentari valeat iura episcopalia solvere et alia incumbentis ipsius ecclesie onera supportare Nulli ergo [] Dat Reate x kalendas Augusti pontificatus nostri anno secundo videlicet anno domini MCCLXXXIX