Charter Document - 05199313

Universis Cristi fidelibus presentes litteras inspecturis frater Thomas permissione divina abbas Burton et eiusdem loci conventus et magister Elyas de Napton archidiaconus Derbeye salutem Cum inter nos videlicet archidiaconum predictum ex parte una et abbatem et conventum predictos ex altera super iurisdictione archidiaconali de tenentibus et hominibus abbatis Burton in parochia de Magna Overe cum capellis de Parva Overe et de Fyndern ac eorum servientibus ad stipendia ibidem que quidem parochia est infra limites archidiaconatus Derb situata quam quidem iurisdictionem nos dictus archidiaconus de iure communi asserimus ad nos spectare debere ac nobis dictis abbate et conventu in contrarium asserentibus nos videlicet et tenentes ac homines nostros et eorum servientes ad stipendia infra parochiam predictam tum per privilegia tum per quandam sententiam pro nobis auctoritate apostolica prius latam ab omni iurisdicitone archidiaconali esse prorsus exemptos fuisset suborta gravis materia questionis tandem habito super hiis diligenti consilio et tractatu post altercationes varias viam pacis elegimus et volumus quod huiusmodi contentio perpetuo terminetur in forma subscripta scilicet ut abbas Burton et tenentes ac homines sui in parochia et duabus capellis predictis et eorum servientes ibidem ad stipendia ab omni iurisdictione archidiaconali perpetuis temporibus sint exempti et suis super hoc privilegiis gaudeant in futurum et solvat abbas qui pro tempore fuerit loci archidiacono perpetuo tres solidos annue pensionis in proximo capitulo post festum sancti Michaelis in decanatu Derbeye celebrando pro omni eo quod sibi competere potuit pretextu iurisdictionis predicte Quia vero archidiaconus Derbeye ecclesiam parochialem de Overe et capellas eiusdem presbiteros et clericos ibidem ministrantes visitat omni anno ac recipit a loci vicario omnia et singula que pro visitatione debentur volumus et concedimus nos predicti abbas et conventus pro nobis et successoribus nostris quod cum archidiaconus Derb ad prefatas ecclesiam de Overe et capellas declinare continget pro visitationis officio taliter exercendo quod per tenentes et homines nostros ibidem licite possit si velit presbiteros et clericos et ceteros ministros ecclesie visitare dum tamen tenentes et homines nostri predicti non trahantur extra parochiam nec mulctentur Si vero archidiaconus in visitatione huiusmodi defectus legitimos in ipsa ecclesia invenerit quorum reparatio spectet ad tenentes nostros predictos libere liceat eidem archidiacono vel suo officiali legitima monitione premissa per excommunicationis et interdicti sententias et modis aliis canonicis sine mulcta compellere dictos parochianos ad plenam reparationem defectuum premissorum Et ut hec prescripta compositio et concordia perpetuo inviolabiliter observetur nos predicti archidiaconus abbas et conventus presentibus litteris in modum cyrographi divisis sigilla nostra quibus utimur in maioribus negotiis et causis mutuo duximus apponenda Testibus venerabilibus viris magistris I de Derb decano I de Kerny precentore A de Walton cancellario A le Breton thesaurario et Roberto de Raddewello canonico Lych ac Guydon officiali domini archidiaconi Coventr specialiter convocatis Acta mense Decembr anno Domini MCC octogesimo quarto