Charter Document - 05199300

Gregorius episcopus servus servorum Dei dilectis in Cristo filiabus priorisse monasterii de Brewode ordinis sancti Benedicti eiusque sororibus tam presentibus quam futuris rectam vitam professis imperpetuum Prudentibus virginibus que sub habitu religionis accensis lampadibus per opera sanctitatis iugiter se properant obviam sponso ire sedes apostolica debet patrocinium impertiri ne forte cuiuslibet temeritatis incursus aut eas a proposito revocet aut robur quod absit sacre religionis enervet Eapropter dilecte in Domino filie vestris iustis postulationibus clementer annuimus et prefatum monasterium sancte Dei genitricis et virginis Marie de Brewod in quo divino estis mancipate obsequio sub beati Petri et nostra protectione suscipimus et presentis scripti privilegio communimus in primis siquidem statuentes ut ordo monasticus qui secundum deum et beati Benedicti regulam in eodem monasterio institutus esse dinoscitur perpetuis ibidem temporibus inviolabiliter observetur Preterea quascumque possessions quecumque bona idem monasterium impresentiarum iuste et canonice possidet aut in futurum concessione pontificum largitione regum vel principum oblatione fidelium seu aliis iustis modis prestante domino poterit adipisci firma vobis et hiis que vobis successerint et illibata permaneant in quibus hec propriis duximus exprimenda vocabulis locum ipsum in quo prefatum monasterium situm est cum omnibus pertinentiis suis et alias possessiones cum pratis vineis terris nemoribus usuagiis et pascuis in bosco et plano in aquis et molendinis in viis et semitis et omnibus aliis libertatibus et immunitatibus suis Sane novalium vestrorum que propriis manibus aut sumptibus colitis sive de vestrorum animalium nutrimentis nullus a vobis decimas exigere vel extorquere presumat Benedictiones vero monialium ordinationes capellanorum vestrorum qui ad sacros fuerint ordines promovendi a diocesano episcopo sine pravitate aliqua vobis volumus exhiberi Sepulturam quoque ipsius loci liberam esse decrevimus ut eorum devotioni et extreme voluntati qui se illic sepelliri deliberaverunt nisi excommunicati vel interdicti sint aut etiam publice usurarii nullus obsistat salva tamen iustitia illarum ecclesiarum a quibus mortuorum corpora assumuntur Obeunte vero te nunc eiusdem loci priorissa vel earum aliqua que tibi successerit nulla ibi subreptionis astutia seu violentia proponatur nisi quam sorores communi consensu vel earum pars consilii sanioris secundum Dei timorem et beati Benedicti regulam providerint elegendam Ad hec liberas et absolutas mulieres e seculo fugientes liceat vobis in monasterio vestro ad conversionem recipere et eas absque contradictione aliqua licentia de eodem loco discedere nisi artioris religionis optentu Discedentes vero absque communi litterarum vestrarum cautione nullus audeat retinere Preterea cum commune interdictum terre fuit liceat vobis clausis ianuis exclusis excommunicatis et interdictis non pulsatis campanis suppressa voce divina officia celebrare Decrevimus ergo ut nulli omnino hominum liceat prefatum monasterium temere perturbare aut eius possessiones auferre vel ablatas retinere minuere seu quibuslibet vexationibus fatigare sed omnia integra conservetur earum pro quarum gubernatione ac sustentatione concessa sunt usibus omnimodis profutura salva sedis apostolice auctoritate et diocesani episcopi iustitia canonica Siqua igitur in futurum ecclesiastica secularisve persona hanc nostre constitutionis paginam sciens contra eam temere venire temptaverit secundo tertiove commonita nisi reatum suum congrua satisfactione correxerit potestatis honorisque sui careat dignitate reamque se divino iudicio existere de perpetrata iniquitate congnoscat et a sacrissimo corpore et sanguine Dei et Domini redemptoris nostri Iesu Cristi aliena fiat atque in extreme examine districte subiaceat ultioni Cunctis autem eidem loco sua iura servantibus sit pax Amen