Charter Document - 05199041

Thomas vicarius ecclesie de Radeford iuratus et diligenter examinatus an materia articuli predictorum executorum in quo petunt absolvi ad cautelam notorie falsa existat dicit quod sic Requisitus qualiter hoc scit dicit quod ipsemet iuratus interfuit vidit et audivit in ecclesia de Leminton Prioris in crastino sancti Georgii martiris in pleno capitulo ibidem celebrato ubi officialis domini archidiaconi Coventr monuit dictos executores tunc ibidem personaliter existentes quod solverent dicto rectori de Wytenass xl solidos infra xv dies proximo subsequentes dictum diem crastinum sancti Georgii sub pena excommunicationis maioris quam extunc protulit in personas eorundem nisi de eadem pecunia satisfacerent Requisitus an sententia excommunicationis postmodum fuerat fulminata in eosdem per dictum officialem dicit quod sic quia iste iuratus inspexit litteram dicti officialis ad denuntiandum ipsos excommunicatos in ecclesiis de Wytenass et ecclesiis vicinis die dominica proxima ante festum ascensionis dominice et similiter iste iuratus ipsos taliter denuntiavit excommunicatos in ecclesia sua de Radeford et sic liquet per datam insertam in inhibitione quam iidem executores impetrarunt ab officiali domini Coventr et Lich episcopi quod post huius sententiam excommunicationis in ipsos latam dictam inhibitionem impetrarunt cuius copiam dictus rector exhibuit sub sigillo officialis dicti episcopi Item requisitus si huius excommunicationis sententia fuerat in eosdem executores lata propter eorum manifestam offensam in non parendo iudicatis super quadam pecunie summa prout in articulo dicti rectoris continetur dicit quod sic quia dicti executores semper hactenus dictam pecunie summam ad quam legitime fuerant condempnati solvere contempserunt et hoc vidit et audivit iste iuratus Dicit etiam requisitus quod contestes sui inferius examinandi omnibus premissis presentes fuerunt Item exhibitum fuit certificatorium decani de Stanl quod executionem dicte excommunicationis testatur et hoc sub sigillo autentico dicti decani Nec instructus nec conductus nec spe lucri nec odio nec amore alitus premissa deponit et constanter deponet Item exhibita fuerunt acta sub sigillo officialis Coventr que dictam contempnationem et sententiam excommunicationis in ipsos latam in scriptis nisi parerent iudicatis testantur Robertus capellanus de Kenillewurth iuratus et diligenter examinatus idem dicit in omnibus et per omnia cum conteste suo preiurato Thomas capellanus vicarii de Radeford iuratus et diligenter idem dicit in omnibus et per omnia cum contestibus preiuratis Facta fuit ista examinatio die veneris proxima ante festum sancti Barnabe apostoli in ecclesia sancte Trinitatis Coventr anno Domini MCC nonagesimo secundo