Charter Document - 05195001
| Charter Number: | 05195001 |
|---|---|
| Cartulary Title: | Coventry and Lichfield 1258-1295 Volume 44 |
| Charter Language: | Latin |
| Charter Origin: | Religious |
| Charter Type(s): | Agreement |
| Date: | 1216 - 1227 |
| Date type: | Assigned |
| Resource Link(s): |
|
Charter:
Omnibus sancte matris ecclesie filijs presentes literas inspecturis Prior Archidiaconus et Cancellarius Herefordie salutem in Domino Noverit universitas vestra quod cum causa verteretur coram nobis auctoritate domini Pape Honorij tercij inter monachos de Brekenia ex una parte et Priorem et Canonicos de Landa ex altera super annua solucione triginta solidorum de ecclesia de Patingham in qua solutione dicti Prior et Canonici per unum annum cessaverunt tandem dicti Canonici de cessacione solucionis Monachis de Brekenia per certum procuratorem satisfecerunt et se per eundem procuratorem in futuro dictos triginta solidos ad terminos in autenticis judicum quondam a domino Papa delegatorum scilicet A de sancto Oswaldo et A de Wirkesope Priorum et bone memorie G quondam Coventriensis Episcopi necnon et prioris et canonicorum de Landa statutos se soluturos obligaverunt firmiter permittentes sine omni calumpnia quod in solucione dictorum triginta solidorum annuatim solvendorum non cessabunt et per eundem procuratorem consenserunt supponentes se jurisdictioni nostre renunciando privilegio fori et appellacioni quod nos retinemus potestatem cohercendi dictos Priorem et canonicos si forte cessaverint in solucione ad dictam solucionem faciendam cum indemnitate Monachorum de Brechonia sunt autem termini in predictis autenticis statuti scilicet quod medietas prefate pecunie solvi debet ad Pascham et medietas ad festum Sancti Michaelis apud Bodeham servienti Monachorum ibidem ministrato Ut autem ista composicio futuris temporibus rata et inconcussa permaneat eam presentis scripti munimine et sigillorum nostrorum apposicione munire curavimus Valeat in domino