Charter Document - 05191035

Universis sancte matris ecclesie filiis ad quos presentes littere pervenerint S de Balynden venerabilis patris Rogeri Dei gratia Coven et Lich episcopi officialis salutem in domino sempiternam Cum per sedem apostolicam sit provide statutum quod secundum facultates ecclesiarum vicarie ordinari debeant unde ipsi vicarii qui pro tempore fuerint iura episcopalia et archidiaconalia possunt persolvere hospitalitatem facere et congruam sustentationem inde habere nos statutum dicte sedis sicut decet in omnibus prout possumus sequi cupientes vicariam de Segeley auctoritate nobis commissa ordinamus in hunc modum videlicet quod vicarius ecclesie de Segeley percipiet imperpetuum totum altaragium unacum decimis omnibus Radulphi filii Sibille et Marione relicte Iohannis Bacun et decimis garbarum villule de Ettingkishall cum ceteris minutis decimis totius parochie et decimis garbarum de tenementis que Ricardus molendarius Ricardus de Flaxall et Iohannes de Thurhull tenent et mortuariis plenarie per totam parochiam unacum decimis garbarum de tenementis Rogeri Russell et Thome de Mushull provenientium Sustinebit etiam dictus vicarius omnia onera ordinaria et tam ecclesie matrici quam capelle honeste faciet deservire et in eisdem libros et ornamenta inveniet Cetera vero extraordinaria unacum reparatione cancelli sustinebunt rectores imperpetuum Ordinamus etiam quod vicarius qui pro tempore fuerit competentem mansum habeat cum curtilagio In huius autem nostre ordinationis munimine huic scripto sigillum officialitatis fecimus apponi salvo iure pontificali Coven et Lich episcopi et parochiali in ecclesia antedicta Dat Lich die sabbati proximo post festum sancti Petri ad vincula anno Domini millesimo ducentesimo septuagesimo quarto