Charter Document - 05191027

Acta in ecclesia cathedrali Lych die martis proxima post festum sancte Trinitatis anno Domini MCC nonagesimo tertio coram nobis officialis venerabilis patris domini R Dei gratia Conventr et Lych in causa que vertitur seu verti speratur inter religiosos viros abbatem et conventum de Burton actores per procuratorem suum legitime constitutum ex parte una et dominum Ricardum Oweyn rectorem ecclesie de Ridewarehamstal reum personaliter comparentem ex altera videlicet cum constaret nobis legitime dictum rectorem ad dictos diem et locum legitime fuisse vocatum pars dictorum religiosorum petiit a dicto rectore decem solidos de arreragiis cuiusdam annue pensionis quinque solidorum eisdem debite ab ecclesia memorata ratione quarundam decimarum de Lythaseles in parochia ecclesie sue de Bromleye existentium Petiit etiam dictum rectorem ecclesie predicte nomine ad solvendum eisdem religiosis dictos quinque solidos annis singulis in quibus ecclesia predicta est eis pensionaria sententialiter condempnari Pars vero rea dictos decem solidos esse debitos de arreragiis ac ecclesiam suam predictam pensionariam esse in quinque solidis annuis ac se velle et debere eandem pensionem annuatim fideliter solvere quamdiu dictam tenuerit ecclesiam in festo annuntiationis beate Marie in iudicio coram nobis sponte confessus est Nos igitur eius confessionem secuti ipsam partem ream ad solvendum parti actrici dictos decem solidos unam scilicet medietatem in festo nativitatis sancti Iohannis baptiste proximo sequente et aliam medietatem in festo assumptionis beate Marie proximo futuro quem terminum pars rea petiit et gratanter admisit et ad solvendum eisdem religiosis dictos quinque solidos nomine pensionis ut predictum est singulis annis in predicto festo annuntiationis in futurum sententialiter et diffinitive condemnamus sub pena excommunicationis quam ex nunc protulimus in personam dicti Ricardi si huic sententie nostre non paruerit in premissis