Charter Document - 05191023
| Charter Number: | 05191023 |
|---|---|
| Cartulary Title: | Coventry and Lichfield 1258-1295 Volume 44 |
| Charter Language: | Latin |
| Charter Origin: | Religious |
| Charter Type(s): | Memorandum |
| Date: | 1275 |
| Date type: | Internal, A.D., Feast |
| Resource Link(s): |
|
Charter:
Memorandum quod coram nobis magistro Symone venerabilis patris domini Rogeri Dei gratia Coventr et Lych episcopi officiali die mercurii in vigilia beati Petri ad vincula anno Domini millesimo ducentesimo septuagesimo quinto in ecclesia cathedrali Lych constitutis in consistorio episcopali et iudicio Rogerus de Croxhale clericus et Willelmus diaconus in monasterio sive ecclesia de Burthon ministrans quem idem Rogerus ad iudicium coram nobis procuraverat evocari personaliter comparentes Cum paratus esset idem Rogerus suam petitionem contra dictum Willelmum proponere comparuerunt frater Matheus de Knyveton monachus de Burthon et Ricardus de Longedon vicarius ecclesie de Broml procuratores religiosorum virorum abbatis et conventus de Burthon proponentes in audientia publice dicto domino abbati per privilegia apostolica esse indultum ut ipse in omni questione et causa in omni parochia sua ius teneat et eas audiat et decidat et quod hac iurisdictione idem abbas et predecessores sui usi fuerint pacifice a tempore cuius non exstat memoria Propter quod petebant predictas partes ad examen et forum dicti abbatis remitti cum idem predicto actori de clerico suo conquerenti paratus sit exhibere iustitie complementum nosque sufficienti nobis super hiis facta fide volentes dictorum religiosorum privilegia inconcussa permanere pro eisdem pronuntiantes partes predictas ad ipsius abbatis remisimus examen In cuius rei testimonium presentibus sigillum officialitatis nostre apponi fecimus Dat Lych anno et die prenotatis