Charter Document - 05191013
| Charter Number: | 05191013 |
|---|---|
| Cartulary Title: | Coventry and Lichfield 1258-1295 Volume 44 |
| Charter Language: | Latin |
| Charter Origin: | Religious |
| Charter Type(s): | Notification |
| Date: | 1249 |
| Date type: | Internal, A.D., Feast |
| Resource Link(s): |
|
Charter:
Reverendo in Cristo patri et domino R Dei gratia Coventr et Lich episcopo humilis suus clericus et devotus R archidiaconus Staff salutem et tam debitam quam devotam cum subiectione reverentiam Noverit paternitas vestra me ad mandatum vestrum in crastino sancte Marie Magdalene in pleno capitulo Tuttesbur super ecclesia de Ridewar diligentem fecisse inquisitionem que quidem talis est quod dicta ecclesia vacat per mortem domini Roberti de Ridewar quondam rectoris eiusdem qui die sabbati proxima ante festum sancti Barnabe apostoli anno Domini millesimo CCXLIX diem clausit extremum Dicit etiam inquisitio quod Willelmus dominus de Ridewar eiusdem ecclesie verus est patronus et quod valet decem marcas et est sine litigio sed solvit ecclesie de Bromley Regis duos solidos et septem denarios pro bono pacis annuatim pro quadam compositione sicut intelligunt de contentione super pane benedicto et quibusdam aliis olim orta inter dictas ecclesias Persona vero ad eandem ecclesiam presentata capellanus est laudabilis et honeste conversationis nec aliud obtinet beneficium unde possit ut debeat ad presens impediri In cuius rei testimonium has litteras meas vobis mitto patentes Conservet vos altissimus tempora longa