Charter Document - 05190648

Universis [] frater Iohannes prior monasterii de Stanes et eiusdem loci conventus ordinis sancti Augustini Coventr et Lich diocesis salutem in Domino sempiternam Cum religiosi viri prior et conventus monasterii de Kenell ordinis et diocesis predictorum quasdam annuas prestationes quas de bonis domus nostre de Stanis in cibariis et aliis emolumentis seu commoditatibus temporalibus percipere consueverant annuatim nobisque nostro monasterio et successoribus nostris remisissent et quietum clamassent omnino nos in recompensationem remissionis huiusmodi eis eorumque monasterio concedimus et obligamus nos et monasterium nostrum et omnia bona nostra pro nobis et successoribus nostris inperpetuum ut tenemur solvere prefatis priori et conventui de Kenell eorumque successoribus annuatim perpetuis temporibus in prioratu de Kenell duodecim marcas et dimidiam bonorum et legalium sterlingorum percipiendas de terris et tenementis nostris in comitatibus Stafford et Warr existentibus ad duos anni terminos infrascriptos scilicet in clauso Pasche sex marcas et dimidiam et in festo sancti Michaelis sex marcas absque more dispendio longioris Et si dicti religiosi de Kenell occasione domus nostre predicte de Stanes obligentur aliquibus in pecuniarum servitiis vel warantiis aut oneribus aliis quibuscumque per compositiones et contractus pro nobis et monasterio nostro iam initos dum eadem domus nostra eisdem subiecta fuerat pleno iure volumus et tenemur pro nobis et successoribus nostris inperpetuum quod omnibus et singulis quibus domus de Kenell ratione dicti monasterii nostri de Stanes qualitercumque fuerat obligata per eam satisfaciemus ad plenum aut eam quantum ad obligationes et warantias huiusmodi futuris temporibus aquietabimus et etiam defendemus ipsos religiosos de Kenell successores eorum et monasterium eorundem quoad hec indempnes penitus concernando Volumus etiam et expresse concedimus per presentes quod dictis priori et conventui de Kenell eorumque successoribus ius patronatus seu advocatio domus nostre de Stanes futuris temporibus remaneat quiete contradictione nostra et successorum nostrorum inperpetuum non obstante sicut in litteris eorundem religiosorum de Kenell suo sigillo signatis que penes nos resident plenius continetur Super quibus omnibus et singulis supradictis per nos et successores nostros firmius imperpetuum observandis recognitionem faciemus in scaccario et in banco domini regis citra festum purificationis beate Marie proximum Promittimus etiam nos in verbo veritatis et sacerdotii corporali nichilominus super hoc per nos prestito inspectis sacrosanctis ewangeliis iuramento hec tenere et fideliter adimplere et in nullo contravenire submittentes nos et omnia bona nostra spiritualia in diocesi Coventr et Lich ac Wigorn existentia cohercioni et iurisdictioni venerabilium patrum dominorum Coventr et Lich ac Wigorn episcoporum et suorum ministrorum qui pro tempore fuerint quod compellant nos per subtractionem fructuum et excommunicationis sententiam aliamque ecclesiasticam censuram quamcumque sine strepitu iudiciali quousque dictis religiosis de Kenell de premissis unacum dampnis et interesse que hac occasione sustinuerint satisfiat ad plenum super quibus stetur iuramento procuratoris seu nuntii eorum sine alterius onere probationis Et ut hec omnia firmius roborentur procurator dictorum religiosorum de Stanes a nobis Rogero permissione divina Coventr et Lich episcopo humiliter postulavit ut obligationi presenti nostrum prebentes assensum obligationem eandem auctoritate diocesana ratificare et confirmare paterna sollicitudine curaremus et dictos religiosos de Stanes ad observationem obligationis eiusdem in omnibus condempnare et ad ea canonice cohercere Nos igitur eius in hac parte precibus annuentes procuratore dictorum prioris et conventus de Stanes coram nobis premissa omnia confitente obligationem eandem ratam habentes ipsique auctoritatem et assensum prebentes eam auctoritate pontificali tenore presentium confirmamus ipsos etiam priorem et conventum de Stanes in persona sui procuratoris et procuratorem eundem ipsorum religiosorum nomine ad observationem omnium premissorum iudicialiter condempnamus et eos et eorum successores ad eorum observationem fore per omnimodam censuram ecclesiasticam ut premittitur compellendos decernimus ipsosque religiosos de Stanes monemus in persona procuratoris sui primo secundo et tertio ut ea in omnibus ut premittitur observent et faciant inviolabiliter observari sub pena excommunicationis maioris quam in contravenientes ex nunc ut ex tunc proferimus in hiis scriptis [] Dat apud Brewood decimo kalendas Ianuarii anno Domini millesimo CC nonogesimo secundo