Charter Document - 05190622
| Charter Number: | 05190622 |
|---|---|
| Cartulary Title: | Coventry and Lichfield 1258-1295 Volume 44 |
| Charter Language: | Latin |
| Charter Origin: | Religious |
| Charter Type(s): | Agreement |
| Date: | 1281 |
| Date type: | Internal, A.D., Calendar |
| Resource Link(s): |
|
Charter:
Pateat universis presentes litteras visuris vel audituris quod nuper inter venerabilem patrem Rogerum Dei gratia Coventr et Lich episcopum ex una parte et sancte Marie Staff Derb Pencrych Tetenhal Wovernehampton Brugg et Salop ecclesiarum decanos et canonicos Coventrensis diocesis ex altera orta materia questionis super eo videlicet quod memoratus episcopus predictas ecclesias que capelle regie wlgariter nuncupantur lege sibi diocesana subiectas esse dicebat quodque spectabat ad eum in eisdem ecclesiis seu capellis visitationis officium et spiritualem iurisdictionem omnimodam exercere ipsis decanis et canonicis asserentibus ex adverso se et predictas ecclesias suas et capellas suas dependentes ab eisdem necnon clerum et populum earundem ab omni ordinaria iurisdictione liberos et exemptos tandem episcopus decani et canonici supradicti volentes potius per vias pacis incedere quam litigiorum amfractibus implicari de voluntate et assensu serenissimi principis Domini Edwardi Dei gratia regis Anglie illustris qui earum ecclesiarum patronus esse dinoscitur in hanc pacis formam consenserunt videlicet quod predicte ecclesie decani et canonici servitores et ministri et parochiani earundem una cum capellis dependentibus ab eisdem ab omni ordinaria iurisdictione remaneant et sint exempti liberi et immunes et sacrosancte Romane ecclesie immediate subiecti ita quod nulli episcopo seu ordinario alteri liceat in ecclesiis predictis aut suis capellis visitare corrigere de causis cognoscere vel aliquid aliud in eisdem facere quod in aliis exemptis ecclesiis fieri minime consuevit adiecto tamen quod predicti decani et canonici concesserunt pro bono pacis ipsi episcopo quod cum ipsum episcopum ad predictas ecclesias declinare contigerit cum processione et honorificentia debita admittatur liceatque eidem de gratia eorundem decanorum et duratura perpetuo in predictis ecclesiis verbum Dei proponere ordines celebrare oleum et crisma conficere et pueros confirmare ita tamen quod pro concessione huiusmodi exemptioni libertati immunitati predictis preiudicium minime generetur Et cum ipsum episcopum in ecclesiis ipsis vel earum capellis ad preces et ad requisitionem dictorum decanorum crisma conficere aut ordines celebrare contigerit clericos dictarum ecclesiarum examinatos et approbatos per decanos ipsos ad presentationem eorundem decanorum ordinabit et crisma et oleum dabit in ecclesiis antedictis si sibi visum fuerit expedire Hec autem compositio sacrosancte ecclesie Romane summo pontifici presentetur et ab ipso confirmetur si ipsam duxerit confirmandam Predictus vero episcopus pro se et dominus rex pro se et decani et canonici predictarum capellarum suarum huic instrumento ad modum cirographi confecto alternatim sigilla sua apposuerunt in testimonium premissorum Act apud Westmon London iii nonas Iunii anno Domini MCCLXXXI