Charter Document - 05190621
| Charter Number: | 05190621 |
|---|---|
| Cartulary Title: | Coventry and Lichfield 1258-1295 Volume 44 |
| Charter Language: | Latin |
| Charter Origin: | Religious |
| Charter Type(s): | Order |
| Date: | 1294 |
| Date type: | Internal, A.D., Episcopal |
| Resource Link(s): |
|
Charter:
R permissione divina Coventr et Lych episcopus dilecto in Cristo filio domino Iohanni de Sutham sequestratori nostro generali salutem gratiam et benedictionem Cum ex frequenti fame et clamoris relatione intellexerimus evidenter quod rector ecclesie de Rolleston eandem ecclesiam suam Radulpho de Rolleston laico et aliis sociis suis similiter laicis ad firmam concessit et dimisit absque consensu et licentia nostra contra cononica instituta cum igitur de obventionibus et proventibus ecclesiasticis laicis disponere non liceat ac eorundem consumptione et dilapidatione per dispositionem laicorum verisimiliter timeatur vobis mandamus in virtute sancte obedientie firmiter iniungentes quatenus proventus et obventiones ad dictam ecclesiam spectantes sequestretis et sub arto sequestro facietis firmiter custodiri quousque a nobis super hoc aliud habueritis in mandatis contradictores et rebelles si quos reppereritis in hac parte per quascumque censuras ecclesiasticas compescendo citetis etiam nichilominus peremptorie prefatos Robertum rectorem et Radulphum de Rolleston ac etiam socios suos quod compareant coram nobis vel commissario nostro ubicumque tunc fuerimus in nostra diocesi proximo die iuridico post festum sancti Gregorii pape super huiusmodi firme dimissione responsuri facturi et recepturi quod consonum fuerit iuri et rationi Et qualiter presens mandatum nostrum fueritis executi nos vel commissarium nostrum ad dictos diem et locum certificetis per litteras vestras patentes harum seriem continentes Valete Dat apud Roulesham viii idus Februarii anno consecrationis nostre tricesimo sexto