Charter Document - 05190616
| Charter Number: | 05190616 |
|---|---|
| Cartulary Title: | Coventry and Lichfield 1258-1295 Volume 44 |
| Charter Language: | Latin |
| Charter Origin: | Religious |
| Charter Type(s): | Grant |
| Date: | 1284 |
| Date type: | Internal, A.D., Episcopal |
| Resource Link(s): |
|
Charter:
Rogerus permissione divina Covent et Lich episcopus dilectis in Cristo filiis abbati et conventui de Roucestr ordinis sancti Augustini salutem gratiam et benedictionem Dignum est ut hiis qui operibus caritatis intendunt et Deo sub regularis observantia discipline devote iugiter famulantur favorem quem secundum dominum possumus impendamus et ne paupertatis necessitate ab hospitalitatis officio retrahantur paterna nos convenit solicitudine providere Cum igitur dilecti in Cristo filii receptioni et obsequio peregrinorum pauperum ac aliorum transeuntium laudabiliter insistatis et tam pro hospitalitatis frequentia quam pro onere eris alieni ut in domo vestra visitantes invenimus manifeste ultra vires et facultates vestras sitis multipliciter onerati nos volentes paterno affectu vestram indigentiam relevare ac cultum divini nominis inter vos pro vestris viribus ampliare ecclesiam de Kyngeston que de vestro patronatu existit cum suis iuribus et pertinentiis Henrico nunc rectore eiusdem cedente vel etiam decedente vobis concedimus divino caritatis intuitu in usus proprios perpetuis temporibus possidendam salva in ipsa ecclesia vicaria competenti per nos et successores nostros ordinanda et taxanda dignitate nichilominus iure et iurisdictione nobis et successoribus nostris et Coventr et Lich ecclesiarum nostrarum in omnibus semper salvis In cuius [] sigillum nostrum presentibus est appensum Valete Dat apud Roucestr die sancti Michaelis anno Domini MCC octogesimo quarto et consecrationis nostre vicesimo septimo