Charter Document - 05190609

Universis sancte matris ecclesie filiis ad quos presens scriptum pervenerit Rogerus de Meulaund miseratione divina Coventr et Lych episcopus salutem in Domino Noverit universitas vestra quod cum mota fuisset questio in curia domini regis super patronatu ecclesie de Eyton nostre diocesis post mortem magistri Willelmi de Eyton ipsius ecclesie vicarii inter dominum Adam de Brunton dominum de eadem Eyton ex una parte et abbatissam et conventum de Pollesworth que a longis retro temporibus ex concessione patronorum et largitatione pontificum predecessorum nostrorum duas partes omnium proventuum ipsius ecclesie cum tribus marcis annuis pro Dominico eiusdem ecclesie possederant pacifice ex altera Tandem utraque pars super modo seu forma presentandi ad partem predictam vacantem et moniales ipse super modo et forma percipiendi duas partes predictas cum tribus marcis nomine Dominici predicti se nostre ordinationi penitus subiecerunt humiliter supplicantes ut super premissis ordinaremus prout secundum deum videremus faciendum Nos igitur invenientes diutinam dictarum monialium in predictis possessionem fuisse pacificam defectus etiam quos eedem moniales obsequiis divinis laudabiliter et studiose intendentes in victualibus patiuntur pio considerantes affectu habita super hiis deliberatione plena de voluntate et assensu capitulorum nostrorum Coventr et Lych in nomine Domini nostri Ihesu Cristi ordinantes statuimus quod moniales memorate percipiant perpetuo annuatim nomine proventuum dictarum duarum partium et Dominici eiusdem ecclesie viginti marcas sterlingorum per manus clerici qui eandem ecclesiam optinuerit pro tempore quodque dictus dominus Adam et heredes sui quotiens dictam ecclesiam vacare contigerit clericum ydoneum ad moniales predictas cum suis litteris destinabunt tempestive supplicando quod ipsum ad eandem ecclesiam presentent quod ipse domine facere sine difficultate qualibet perpetuis temporibus tenebuntur Per hanc nostram presentem ordinationem ordinamus insuper et statuimus quod clericus sic presentatus sive alius quicunque ad dictam ecclesiam admissus antequam possessionem corporalem ipsius ecclesie accipiat personaliter ad dominas easdem accedere debeat et solempniter super evangelium in capitulo earundem iurare quod fideliter et bona fide dictas viginti marcas solvet eisdem annuatim medietatem scilicet in festo purificationis beate virginis at aliam medietatem in festo beati Iohannis baptiste apud Pollesworth et etiam ibidem promittere eis bona fide in virtute sacramenti prius ab eo prestiti quod quotienscumque terminis assignatis vel eorum altero non solverit dabit eis nomine pene tres marcas sterlingorum et solvet eas infra viginti dies proximas sequentes una cum debito principali Et si forte a iudice ydoneo infra dictas viginti dies ad solvendum monitus non solverit vel infra tempus illud non comparuerit et se per litteras earundem monialium plene solvisse docuerit concedet et assentiet quod idem iudex sine ulteriori dilatione et omni strepitu iudiciali ipsum extunc per censuram ecclesiasticam de plano compellat ad omnium premissorum observationem et nichilominus ad interesse et expensarum plenariam solutionem credendo de expensis et interesse simplici iuramento procuratoris ipsarum dominarum petitione pene et principalis debiti rata manente Et ad maiorem securitatem statuimus similiter ordinantes quod si premissa iuxta huius ordinationis nostre tenorem per aliquem ad eandem ecclesiam admissum non fuerint observata liceat dominabus seu procuratoribus earundem domos et Dominicum predicte ecclesie ingredi huius ordinationis auctoritate et sua cum duabus partibus omnium proventuum eiusdem ecclesie pacifice possidere tenere et habere donec de eisdem non soluta dampna interesse et expensas penam seu penas commissam seu commissas et principale debitum plene receperint Ordinamus etiam et statuimus quod quicumque clericus ecclesiam predictam pro tempore habens et premissa plene non solvens impedierit seu fecerit vel sustinuerit ab aliis impediri quominus dicte domine seu procuratores vel servientes earundem nomine earum possessionem domorum Dominici et partium predictarum libere ingrediantur vel ingressum habeant in forma prescripta pacifice eo ipso omni iure quod in ipsis habuit vel habere potuit sit omnino privatus et eedem moniales eadem omnia cum suis pertinentiis ipsius perpetuo optineant pacifice Ordinamus insuper et providemus de assensu capitulorum nostrorum quod nulli clerico ad dictam ecclesiam presentato et admisso littere missionis in corporalem possessionem concedantur aut fiant donec idem clericus iuraverit ut superius premissum est et litteras suas patentes de tali iuramento prestito et hac ordinatione nostra observanda plenarie fecerit et predictis dominabus tradiderit In premissorum autem testimonium presenti scripto in modum cirograffi confecto sigilla dictorum capitulorum nostrorum una cum sigillo nostro sunt appensa Partes etiam scripto eidem alternatim sua sigilla ad maiorem eorum securitatem apponere curaverunt Dat anno Domini millesimo CCLX primo mense Aprilis intrante