Charter Document - 05190595
| Charter Number: | 05190595 |
|---|---|
| Cartulary Title: | Coventry and Lichfield 1258-1295 Volume 44 |
| Charter Language: | Latin |
| Charter Origin: | Religious |
| Charter Type(s): | Ordination |
| Date: | 1290 |
| Date type: | Internal, A.D., Calendar, Episcopal |
| Resource Link(s): |
|
Charter:
In Dei nomine amen Nos Rogerus permissione divina Coventr et Lych episcopus vicariam ecclesie de Esseburn quam decanatui ecclesie Linc in usus proprios re habendam concessimus inquisitione super hoc prehabita diligenti ac ecclesie ipsius facultatibus ponderatis auctoritate pontificali partibus presentibus taliter ordinamus videlicet quod Robertus nunc vicarius ibidem et alii successores sui qui pro tempore fuerint habeant placeam pro manso suo que iacet inter viam que ducit de cimiterio usque ad pontem ex parte una et usque ad murum cimiterii et vivarium rectoris ex parte altera in latitudine et in longitudine a cimiterio usque ad ductum de Stollebroke et quod sumptibus rectoris fiant edificia competentia in eadem Percipiant etiam vicarii omnia mortuaria exceptis equis cum hernasiis et armis decimam lini et cannabi si fuerit decimam etiam purcellorum arcarum curtilagiorum gardinorum pullanorum vitulorum et albi totam portionem omnium decimarum quadragesimalium et omnes oblationes per annum sive in pecunia numerata sive in cera consistant et decimam molendinorum totius parochie et percipiant etiam vicarii decimam garbarum et feni de Clifton Parva et Magna decimam feni de Metheleyg et Longelis et de prato comitis decimam medietatis garbarum annuatim provenientium de Methelig exceptis Dominicis rectoris tam in garbis quam in pratis Vicarii vero episcopalia et archidiaconalia onera sustineant Rector autem omnia alia sustinebit Reservamus insuper nobis et successoribus nostris episcopis potestatem addendi ad ordinationem predictam ac etiam mutandi eandem cum propter variationem temporis vel alias causas legitimas videbitur expedire In cuius rei testimonium impressio sigilli nostri presentibus est appensa Dat apud Haywod xiii kalendas Novembris anno Domini millesimo CC nonagesimo et consecrationis nostre xxxiii