Charter Document - 05190593

Omnibus presentes litteras inspecturis Rogerus divina miseratione Coventren et Lychefelden episcopus salutem in omnium salvatore Noverit universitas vestra quod cum nonnulli decani Lincolnienses ecclesiam de Asseburn Coventrensis et Lychefeldensis dioecesis in qua ratione sui decanatus ius patronatus tunc optinebant aliquamdiu in usus proprios tenuissent tandem per quamdam ordinationem quam fecit bone memorie Coventr et Lichefelden episcopus cum quondam decano Lincoln ecclesie perpetuus est in ea vicarius institutus cui omnes proventus eiusdem ecclesie fuerant deputati salvis dumtaxat quinquaginta marcis annuis decano Linc ecclesie qui pro tempore foret per manus vicariorum perpetuis temporibus exsolvendis Coventr et Lychefelden capitulorum assensu ad hoc ut dicitur accedente Propter quod magister Ricardus de Gravesend promotus postmodum in decanum reputans dictam ordinationem factam in ipsius decanatus et suam non modicam lesionem ad sedem apostolicam accedens humiliter supplicavit super hoc sibi et eidem decanatui provideri cuius precibus pie recordationis Alexander quartus tunc summus pontifex inclinatus nolens ex predictis dictum decanatum pati huiusmodi lesionem ut idem magister Ricardus vel successores sui dictam ecclesiam cedente vel decedente ipsius ecclesie vicario in proprios usus decanatus eiusdem libere revocare valeret ipsam dicto decanatui cum omnibus suis iuribus proventibus et pertinentiis applicando ac etiam ingredi possessionem illius prout dictorum suorum predecessorum temporibus ab ipsis haberi solebat nostro vel archidiaconi loci seu cuiuslibet alterius assensu minime requisito assignata tamen vicario qui pro tempore foret in eadem ecclesia de ipsius ecclesie proventibus portione congrua unde valeret comode sustentari ac episcopalia et archidiaconalia iura [] ipsius ecclesie onera supportare ordinatione aut premissis minime obstantibus aut aliquibus litteris sedis apostolice vel indulgentiis optentis vel etiam optinendis per quas huiusmodi gratia posset impediri vel saltem differri auctoritate sedis apostolice duxit liberaliter indulgendum Cumque post hec vicaria memorata vacante per mortem vicarii loci eiusdem magister Robertus de Mariscis tunc decanus Linc auctoritate sedis et concessionis predicte possessionem predicte ecclesie de Asseburn nostro etiam interveniente consensu expresso canonice fuisset adeptus et eandem per aliquod tempus pacifice possedisset Demum ipse super possessione vel quasi iuris patronatus eiusdem ecclesie ab illustri rege Anglie quondam Henrico in propria curia ipsius regis conventus per breve quod de ultima presentatione vulgariter appellatur in possessorio vel quasi contrariam sententiam reportavit coram iudice seculari Sicque dicto rege illustri presentante nobis Petrum de Wynton clericum suum nos de mandato regis et speciali precepto per varias districtiones artati atque compulsi predictum Petrum ad ecclesiam predictam de Asseburn admisimus iuxta regni consuetudinem et rectorem instituimus in eadem predicto decano per nostram vel alterius iudicis ecclesiastici sententiam ab eadem ecclesia non amoto Sicut hec omnia et singula quasi in formam publicam redacta in quadam littera nostra patenti magno sigillo nostro sub data mense Februarii anno Domini MCC septuagesimo tertio consignata fideliter et pleniter intelleximus contineri Set ecce magnifico principe domino Edwardo nunc Anglie rege illustri predicto patri suo domino Henrico processu temporis in maiestatem regiam succedente idem dominus noster cui semper quam plurimum cordi fuit ecclesias et viros ecclesiasticos ad statum debitum ab insidiis obliquis et oppressionibus quibuslibet diligentia laudabili relevare ius patronatus eiusdem ecclesie de Asseburn quod a religiosis viris abbate et conventu Vallis Regie quibus illud pro sue voluntatis beneplacito parum ante contulerat sibi fuerat iuxta ordinationem ipsius plene legitime atque pacifice ex certa scientia gratis redditum et restitutum omnino cum omnibus suis appendiciis et pertinentiis ecclesie Lincoln ac decano et capitulo supradictis fervido zelo catholice devotionis assumpte inperpetuum concessit dedit contulit et eis velut ius suum proprium pro maiori certitudine reddidit intuitu pietatis sicut hec omnia et singula de facto suo in carta eiusdem excellentis principis nostri domini Edwardi inde confecta et sigillo suo patenti signata perfectius atque plenius intelleximus contineri Nos igitur de huiusmodi redintegratione et relevatione seu renunciatione iuris dictorum decani et capituli ecclesie Linc in ecclesia predicta de Asseburn affectione paterna moti gaudentes et insuper ex bono conscientie recta considerationis acie perspicaciter attendentes favorem Deo valde acceptum qui ecclesiis et maxime cathedralibus in quibus cotidianis conatibus assiduis sine intermissionis fastidio continue colitur ipse deus pro huiusmodi cultus augmento ex causa rationabili exhibetur et precipue ubi res ad suam redit naturam et priori redditur forma sue ut dominus Philippus de Wilghby nunc decanus ecclesie Linc predictam ecclesiam de Asseburn per mortem dicti domini Petri ad presens de facto vacantem cum omnibus suis iuribus et pertinentiis in proprios usus decanatus eiusdem libere iuxta prememoratam concessionem apostolicam ex renovato iure ipsius ecclesie Linc protinus valeat revocare ipsam decanatui predicto cum omnibus suis iuribus proventibus et pertinentiis inperpetuum applicando ac etiam ingredi et continuare possessionem eiusdem ecclesie prout predictorum predecessorum suorum temporibus ab ipsis haberi solebat et nos ipsi prenominato magistro Roberto de Mariscis quondam decano Linc predecessori suo concessimus iam est diu interruptione qualibet cuiuscumque hominis vel temporis interim contingente de facto nequaquam obstante ex nunc auctoritate dioecesana plene et plane sibi decano et capitulo eiusdem ecclesie Linc ex certa scientia concedimus per presentes quibus insuper decano et capitulo ecclesiam predictam de Asseburn cum omnibus suis iuribus et pertinentiis et pacificam possessionem eiusdem secundum ius patronatus adquisitum seu renovatum sibi iam de novo ut predicitur in eadem nos ipsi pro divini cultus augmento ceptum prosequentes favorem quantum in nobis est auctoritate pontificali damus conferimus et tenore presentium irrevocabiliter confirmamus intuitu caritatis perpetuis decanatus eiusdem ecclesie Lincoln usibus profuturas reservantes tamen nobis potestatem auctoritate ordinaria assignandi vicario qui pro tempore in eadem ecclesia fuerit de ipsius ecclesie proventibus portionem congruam unde valeat comode sustentari et episcopalia et archidiaconalia iura [] ipsius ecclesie onera supportare In quorum omnium testimonium sigillum nostrum presentibus est appensum Act et dat apud Eccleshale octavodecimo kalendas Maii anno Domini MCC octogesimo nono et pontificatus nostri tricesimo secundo