Charter Document - 05190591

Omnibus presentes litteras inspecturis R divina miseratione Coventr et Lich episcopus salutem in omnium salvatore Noverit universitas vestra quod cum nonnulli decani Lincoln ecclesiam de Esseburn Coventrensis et Lichfeldensis dioecesis in qua ratione sui decanatus ius patronatus tunc optinebant aliquam diu in proprios usus tenuissent tandem per quandam ordinationem quam fecit bone memorie Coventr et Lich episcopus loci dioecesanus cum quondam decano Lincoln ecclesie perpetuus est in ea institutus vicarius cui omnes proventus eiusdem ecclesie fuerant deputati salvis duntaxat quinquaginta marcis annuis decano Lincoln ecclesie qui pro tempore fuerit per manus vicariorum perpetuis temporibus exsolvendis Coventr et Lich capitulorum assensu ad hoc ut dicitur accedente Propter quod magister Ricardus de Graveshende promotus postmodum in decanum reputans dictam ordinationem factam in ipsius decanatus et suam non modicam lesionem ad sedem apostolicam accedens humiliter petiit super hoc sibi et eidem decanatui provideri cuius precibus pie recordationis Alexander tunc summus pontifex inclinatus nolens ex predictis dictum decanatum pati huiusmodi lesionem ut idem magister vel successores sui dictam ecclesiam cedente vel decedente ipsius ecclesie vicario in proprios usus decanatus eiusdem libere possent revocare ipsam dicto decanatui cum omnibus suis iuribus proventibus et pertinentiis applicando ac etiam ingredi possessionem eius prout dictorum suorum predecessorum temporibus ab ipsis haberi solebat nostro vel archidiaconi loci vel cuiuslibet alterius assensu minime requisito assignata tamen vicario qui pro tempore fuerit in eadem ecclesia de ipsius ecclesie proventibus portione congrua unde valeat comode sustentari et episcopalia et archidiaconalia iura [] ipsius ecclesie onera supportare ordinatione aut premissis minime obstantibus aut aliquibus litteris sedis apostolice vel indulgentiis optentis vel optinendis per quas huiusmodi gratia possit impediri vel differri auctoritate sedis apostolice duxit liberaliter indulgendum Cumque post hoc vacante vicaria memorata per mortem vicarii magister Robertus de Mariscis tunc decanus auctoritate predicte sedis possessionem predicte ecclesie de Esseburne nostro interveniente consensu expresso canonice fuisset adeptus et eandem per aliquod tempus pacifice possedisset Demum super possessione vel quasi iuris patronatus eiusdem ecclesie ab illustri rege Henrico quondam rege Anglie in propria curia ipsius regis conventus per breve quod de ultima presentatione vulgariter appellatur in possessorio vel quasi contrariam sententiam reportavit coram iudice seculari Sicque dicto rege illustri presentante Petrum de Wynton clericum tunc Wyntoniensis nunc Coventrensis et Lichfeldensis dioecesis nobis Coventr et Lich episcopo nos de mandato regis et precepto speciali per varias districtiones artati et compulsi predictum Petrum ad ecclesiam de Esseburne admisimus iuxta regni consuetudinem et rectorem instituimus in eadem predicto decano per nostram vel alterius iudicis ecclesiastici sententiam ab eadem ecclesia non amoto Et quia hec per dioecesem Coventrensem et Lichfeldensem publica sunt et notoria nos R Dei gratia Coventr et Lich episcopus predictus in memoriam rei geste presentibus in formam publicam redactis sigillum nostrum apponi fecimus in testimonium veritatis Act mense Februarii anno Domini MCC septuagesimo tertio