Charter Document - 05190590
| Charter Number: | 05190590 |
|---|---|
| Cartulary Title: | Coventry and Lichfield 1258-1295 Volume 44 |
| Charter Language: | Latin |
| Charter Origin: | Religious |
| Charter Type(s): | Memorandum |
| Date: | 1262 |
| Date type: | Internal, A.D., Feast |
| Resource Link(s): |
|
Charter:
Memorandum quod anno Domini MCC sexagesimo secundo die omnium sanctorum London venerabilis pater Rogerus Dei gratia Conventrens et Lichefeldens episcopus ad presentationem et rogatum capituli Lincol admisit magistrum Willelmum de Lessington decanum ecclesie Lincoln ad omnia beneficia et iura ecclesiastica et ad omnia temporalia et spiritualia ad decanatum ecclesie Linc in diocesi sua spectantia qualitercunque et eundem rectorem instituit in ecclesiis curam animarum habentibus ad ipsum decanatum pertinentibus in dicta diocesi consistentibus ipsum in eisdem ecclesiis et omnibus aliis beneficiis ecclesiasticis et iuribus per palleum corporaliter in vestiendo et nomine eorundem beneficiorum ab ipso decano obedientiam canonicam promissam recipiendo exceptis dumtaxat ecclesia de Esseburn in cuius possessione alius tunc existit ad presentationem domini regis recuperata per iudicium curie sue et ecclesia de Werkesword pro eo quod dominus Robertus de Ferar prius presentaverat quemdam clericum ad eandem super qua presentatione tunc inquisitio pendebat Et protestatus est dictus decanus coram domino episcopo se habere ius integraliter in dicta ecclesia de Esseburn ratione sui decanatus vel saltem in quinquaginta marcis annuatim recipiendis nomine personatus seu pensionis de bonis eiusdem ecclesie per manus ipsius qui ipsam ecclesiam habere seu tenere contigerit secundum ordinationem olim factam in hac parte auctoritate bone memorie Hugonis episcopi Coventr et Lichefeld et possessionem de eisdem quinquaginta marcis a suis predecessoribus secundum eandem ordinationem pacifice obtentam Quantum autem ad ecclesiam de Werkesword proposuit et protestatus est similiter dictus decanus quod ipsa pertinet ad ius et possessionem sui decanatus et ad nullum alium unde dicta presentatio facta ad eandem per Robertum de Ferar nullatenus tenuit nec tenet nec prestare debet aliquod impedimentum quominus idem decanus ad eandem admittatur secundum quod predecessores sui pacifice consueverunt admitti tam a dicto domino episcopo quam a predecessoribus suis Innovavit etiam idem decanus coram dicto domino episcopo omnes appellationes coram ipso pro se seu nomine suo prius interpositas per quascunque personas et nomine capituli et easdem ratificavit