Charter Document - 05190571

Universis sancte matris ecclesie filiis presentes litteras inspecturis vel audituris Rogerus permissione divina Coventr et Lich episcopus eternam in Domino salutem Ad universitatis vestre notitiam volumus pervenire quod cum inter dilectos filios magistrum Radulphum decanum Lich et dominum Willelmum de Eccheshale eiusdem ecclesie canonicum super ecclesia de Adbaldeston nostre diocesis lis mota esset prefato canonico nomine prebende sue ipsam petente ac decano prefato ipsam decanatui suo annexam possidente predicti decanus et canonicus communi assensu et spontanea voluntate a lite mota discedentes et expresse renuntiantes inpetratis et inpetrandis et omnibus processibus super eadem ecclesia inter ipsos habitis et habendis se nostre ordinationi pure et simpliciter submiserunt in nostra promittentes presentia corporali prestito iuramento quod ordinationem quam super eadem ecclesia cum eius pertinentiis faceremus reverenter sustinerent et firmiter observarent Nos autem quieti partium et indempnitati Lich ecclesie prospicere cupientes attendentes etiam quod prefata ecclesia decanatui Lich ecclesie diu ante tempora nostra ex iusta et rationabili causa canonice fuit unita nec ab eodem decanatu absque enormi lesione ipsius et ecclesie Lich detrimento posset separari in nomine patris et filii et spiritus sancti amen de expresso consensu et voluntate capitulorum Coventr et Lich ecclesiarum solempni et diligenti tractatu prehabito sic duximus ordinandum quod predicta ecclesia predicto decanatui perpetuo remaneat annexa et predictus decanus et successores sui ipsam cum omnibus suis pertinentiis nomine predicti decanatus habeant et possideant predicto canonico et successoribus suis via penitus preclusa ipsam ecclesiam decetero vendicandi Ordinamus etiam quod prefatus decanus prefato canonico quem bona fide litem movisse et graves in lite sumptus fecisse perpendimus octoginta marcas argenti pro bono pacis in ecclesia Lich persolvat in utilitatem ipsius canonici prout sibi expedire visum fuerit convertendas videlicet unam medietatem in festo sancti Michaelis post hanc ordinationem proximo futurum et aliam medietatem in festo sancti Botulphi proximo sequenti Preterea volumus et assignamus quod idem decanus et canonicus consilium auxilium et fidelem diligentiam apponant ad providendum et faciendum modis omnibus quibus id melius et securius fieri poterit quod hec ordinatio nostra perpetue robur optineat firmitatis Hanc autem ordinationem nostram prefati decanus et canonicus in nostra presentia inspexerunt legerunt manibus propriis tractaverunt et ipsam ratam habentes et acceptam concorditer approbarunt In omnium autem premissorum testimonium et perpetam memoriam presentes litteras sigillo nostro unacum sigillis predictorum capitulorum decani et canonici fecimus communiri ratis manentibus ordinatione super eadem per Hugonem quondam Coventr et Lich episcopum de expresso consensu capituli sui facta cum subsequentibus confirmationibus inde habitis quibus per hanc nostram ordinationem non intendimus in aliquo derogare sed ipsas penitus roborare Dat in capitulo Lich xviii kalendas Octobris anno Domini millesimo CC sexagesimo