Charter Document - 05190569

Universis presens scriptum visuris vel audituris Rogerus miseratione divina Coventr et Lich episcopus salutem in Domino Noverit universitas vestra quod cum in ecclesia de Lappel visitationis officium excercentes vicariam ipsius ecclesie minus sufficientem invenerimus de consensu expresso et concordi voluntate fratris Galcherii prioris de Lappel et monachorum ibidem Deo servientium communicato consilio peritorum ita duximus ordinandum videlicet quod vicarius quicumque pro tempore fuerit nomine vicarie sue habeat et libere ac quiete possideat unam nokam terre cum mesuagio domibus gardino crofto et pratis ad dictam vicariam pertinentibus et tres acras terre eidem vicarie adnexas unacum quadam acra terre quam Robertus quondam vicarius habuit de perquisito suo que vicarii eiusdem ecclesie habere consueverunt Volumus etiam et ordinamus quod vicarius quicumque pro tempore fuerit libere et pacifice habeat et percipiat totum alteragium sine aliqua diminutione omnes minutas decimas cum omnibus decimis feni totius parochie omnes oblationes obventiones ad alteragium pertinentes decimam lini et lane agnorum vaccarum et vitulorum pullorum et ovorum aucarum purcellorum et porrecte ac pomorum et omnia mortuaria et universa et singula que vicarii predicte ecclesie ante tempus istius nostre ordinationis percipere consueverunt Ordinamus insuper quod vicarius qui pro tempore fuerit habeat communam in bosco prioris ad octo averia et sufficientem clausuram ad sepes suas quandocumque opus fuerit claudendas libere et pacifice sine omni conditione et impedimento prioris de Lappel qui pro tempore fuerit vel cuiuscumque alterius Volumus etiam et ordinamus predictorum prioris et monachorum expresso interveniente consensu et concordi voluntate quod vicarius quicumque pro tempore fuerit ad augmentum vicarie sue que minus sufficiens erat habeat et pacifice possideat totam decimam bladi provenientis de terra Henrici de Bykeford et de terra Willelmi de Bykeford et de terra quam tenet Simon Prumnel de Hydesland et de terra Willelmi servientis de Pencr apud Hydesland et de terra Roberti et Aldithe vidue de Hydeslond et de terra quam cepit Adam ad molendinum cum uxore sua cum decima bladi duarum acrarum terre et dimidium quas habet idem Adam de perquisito suo Volumus etiam quod habeat vicarius de molendino quod vocatur Ruthlemelne quatuor denarios annuatim et quod vicarius inperpetuum liberus sit a prestatione seu solutione annua sex denariorum et oboli quos vicarius nomine firme pro tribus acris extra nokam terre predictam priori de Lappel solvere consuevit quos sex denarios et obolum prefatus prior inperpetuum remisit pro se et suis successoribus simul cum omni servitio et exactione quod servitium et quam exactionem prior de Lappel a vicario ex quacumque causa exigere consuevit Prior insuper quicumque pro tempore fuerit de procuratione archidiaconi synodalibus et de denariis qui ab ecclesia predicta die qua cantatur letare Ierusalem solvi consueverunt suis sumptibus plenarie respondebit et a prestatione onerum ordinariorum et extraordinariorum omnino vicarium liberabit Vicarius autem ecclesie predicte in divinis officiis in ordine sacerdotali in propria persona competenter et honeste deserviet et per ydoneos et sufficientes ministros faciet deserviri Prior vero alios ecclesie predicte proventus sine contradictione percipiat videlicet decimas garbarum alias ab hiis que superius sunt expresse Hanc nostram ordinationem prefati prior et monachi inspexerunt legerunt et in propriis manibus tractaverunt et pro se et suis successoribus approbaverunt Excommunicationis autem maioris sententiam protulimus in omnes qui hanc ordinationem nostram in aliqua sui parte exnunc temere presumpserint violare In premissorum autem omnium testimonium presenti scripto sigillum nostrum fecimus apponi Et prefatus prior pro se et monachis suis et eorum successoribus eidem scripto sigillum suum apposuit Valete Dat Brewod xiiii kalendas Aprilis anno Domini millesimo ducentesimo sexaginta quinto