Charter Document - 05190329

Universis sancte matris ecclesie ad quos pervenerit hec scriptura Rogerus permissione divina Coven et Lich episcopus salutem in omnium salvatore Cum inter religiosos viros abbatem et conventum de Deulacresse ordinis Cisterciencis qui ecclesiam de Leek in usus proprios obtinent ex parte una et Robertum de Tutburye presbyterum vicarium eiusdem ecclesie super eiusdem vicarie portionibus suborta fuisset coram nobis gravis materia questionis prefato vicario quasdam certas portiones petente per magistrum Symonem de Balendem tunc commissarium nostrum ut idem vicarius asseruit ordinatas a qua ordinatione religiosi se dicebant legittime appellasse et huiusmodi causam appellationis pendere indecisam ac pro eo ordinationem huiusmodi si que extitit minime debere executioni aliqualiter demandari Demum pro bono pacis et ad amfractus litium evitandos vicarius memoratus deliberate pure sponte et absolute ordinationem huiusmodi et vim omnem quod sibi competere potuit ex eadem et omni alia auctoritate cuiuscumque in hac parte facta et datam presentium precedente expresse renuntiavit parte similiter religiosorum predictorum ab omnibus appellationibus et impetrationibus suis ea occasione interpositis et factis penitus recedente et pars utraque ordinationi nostre in hac parte totaliter se submisit Unde nos deliberatione provida et inquisitione per fidedignos super hoc prehabita diligenti de earundem partium consensu expresso vicariam predictam de Leeke auctoritate diocesana ordinavimus et taxamus in portionibus infrascriptis videlicet quod vicarius qui pro tempore fuerit percipiat omnes oblationes anni in pecunia et aliis quibuscumque consistentes et in die Purificationis totam pecuniam quadragesimalem servientibus abbatis non uxoratis dumtaxat exceptis denarios carucarum decimam lini et canabi et omnia perquesita casualia ut delegata sponsalibus vigiliis testamentorum et consimilibus decimam ovorum aucarum et ovium porcellorum totius parochie decimam et ortorum et curtilagiorum omnium rullarum et aliorum decimam et feni de Endon Item percipiat vicarius qui pro tempore fuerit de dictis religiosis sex marcas annuas in pecunia numerata ad tres terminos anni in festo sancti Petri ad vincula duas marcas in festo sancti Andree apostoli et in festo Pasche duas marcas Habeat et vicarius mansum illum cum pertinentiis iuxta ecclesiam quod nunc inhabitat et alii vicarii consueverunt Faciet vicarius ecclesie per presbiteros honestos et clericos deserviri Rectores vero omnia onera alia ordinaria et extraordinaria ecclesie incumbentia sustinebunt Ordinavimus et decrevimus per presentes partium predictarum consensu expresso interveniente quod si contingat ordinationes vel confirmationes quascumque vel impetrationes aliquas datam presentium precedentes super vicaria predicta per quoscumque factas inveniri ille totaliter habeanter irrite et nullius penitus sint momenti Et hec nostra presens ordinatio robur obtineat firmitatis nisi propter mutationem variam et instabilem temporis secundum sue exigentiam eam iustis rationibus contigerit immutari Datum et actum apud Haywood tertio nonas Iunii anno Domini millesimo ducentesimo octogesimo octavo et consecrationis nostre tricesimo primo