Charter Document - 05190308
| Charter Number: | 05190308 |
|---|---|
| Cartulary Title: | Coventry and Lichfield 1258-1295 Volume 44 |
| Charter Language: | Latin |
| Charter Origin: | Religious |
| Charter Type(s): | Notification |
| Date: | 1288 |
| Date type: | Internal, A.D., Calendar, Episcopal |
| Resource Link(s): |
|
Charter:
Universis pateat per presentes quod nos Rogerus permissione divina Coventr et Lych episcopus vicariam ecclesie de Leghton diligenti inquisitione prehabita et iuris ordine prout convenit observato ordinamus in portionibus infrascriptis In primis videlicet quod vicarius habeat edificia competentia sumptibus abbatis et conventus de Buldewas qui ecclesiam predictam in usus proprios optinent construenda et dimidium croftum quod iacet iuxta croftum Simonis Bagot nunc vicarii ecclesie predicte ad suum curtilagium faciendum Habeat etiam idem vicarius qui pro tempore fuerit pratum unum quod vocatur Chirchemedwe in Les Holeres de Hadeleg et aliud pratum quod vocatur Le Marescall in Le Heycroft Habeat etiam vicarius duo curtilagia in villa de Leghton et unam acram terre cum uno selione ad ecclesiam predictam pertinentia ad inveniendum sibi focalia et similiter communam pasturam ad x boves et vaccas xxv oves x porcos et unum affrum Percipiat etiam vicarius tertiam partem decimarum garbarum de Eton Costentyn quam rector ecclesie de Leghton predicte percipere consuevit et totam decimam feni totius parochie Item percipiat vicarius omnia mortuaria seu principalia decimam agnorum lane lactis et vitulorum oblationes quascumque et omnia alia ad alteragium qualitercumque spectantia et vicarius sinodalia persolvet et duos cereos processionales inveniet Rectores vero omnia onera ordinaria alia et etiam extraordinaria sustinebunt In cuius rei testimonium impressio sigilli nostri presentibus est appensa Dat apud Heywodam xii kalendas Maii anno Domini millesimo CCLXXXVIII et consecrationis nostre xxxi