Charter Document - 05190296

[U]niversis sancte matris ecclesie filiis presentes litteras [in]specturis vel etiam audituris [Roger]us permissione divina Coventr et Lich episcopus salutem in vero omnium salvatore [Ad] universitatis vestre notitiam volumus per[venire quod cum] nobis olim nobilis vir dominus Edmundus inclite recordationis Henrici illustris regis Anglie filius discretum virum dominum Hugonem le []a clericum ad ecclesiam de Spondon nostre diocesis presentasset ac religiosi viri [] magister et fratres sancti Lazari de Burton qui eiusdem ecclesie possessioni incumbebant et quam asseruerunt sibi legitime in usibus propriis applicatam ipsius domini Hugonis admissioni et institutioni se instanter opposuissent nos causam eandem [] cancellario ecclesie Suthmalling commisimus sine debito terminandam qui contra religiosos prefatos pro ipso domino Hugone sententiam tulit diffinitivam a qua iidem religiosi sedem apostolicam appellarunt Et dictus dominus Hugo pro confirmatione sententie huiusmodi [] decano ecclesie sancti Martini Magni London litteras apostolicas impetravit qui cum vices suas in hac parte [] priori de [Ber]mundeseya commisisset et commisarius ipse oblatis coram eo ex parte dicti domini Hugonis super confirmatione sententie prenotate libello conventionali ac [ex] par[te] eorundem religiosorum pro infirmanda ipsa sententia libello recon[ventio]nali sententiam per prefatum cancellarium latam rite ut nobis religiosi ipsi asseruerunt et observato in omnibus iuris ordine infirmavit ipsos religiosos in possessione illius ecclesie fore tuendos sententialiter decernendo Propter quod magister et fratres predicti ad nos cum devotionis spiritu accedentes nobis humiliter supplicarunt ut eisdem paterno compatientes affectu iura appropriationis illius ecclesie et munimenta per [] comites quondam patrones ipsius ecclesie et episcopos predecessores nostros ac etiam auctoritate Romani pontificis eis concessa examinari cum diligentia faceremus et eadem auctoritate pontificali approbare ac etiam confirmare caritatis intuitu dignaremur Ad fructus itaque uberes quos ordo ille in terra Ierosolamitana contra Cristiane fidei inimicos hactenus producere consuevit et in futurum speratur Deo auspice producturos attente considerantes cartas privilegia et munimenta super appropriatione illius ecclesie de Spondon eis concessa cum deliberatione provida examinari fecimus diligenter per quam quidem examinationem evidenter comperimus quod ius patronatus dicte ecclesie per comites de Ferar diversos veros patronos quondam ecclesie ipsius religiosis predictis est concessum ecclesiaque eadem per bone memorie Ricardum et Rogerum predecessores nostros ac auctoritate sanctissimi patris domini [] Innocentii pape quarti ipsis legitime appropriata [est] Invenimus etiam dictos religiosos ecclesiam illam pretextu appropriationis huiusmodi diutissime in usus proprios tenuisse pacifice et quiete sententiamque diffinitivam auctoritate iudicis a sede apostolica delegati pro ipsis rite latam esse Quocirca appropriationem predictam auctoritate pontificali approbamus et ut ad hoc iuris necessitate astringimur acceptamus ac etiam tenore presentium confirmamus In cuius rei testimonium [imp]ressio sigilli nostri presentibus est appensa Dat apud Kynilleworth xi kalendas Februarii anno Domini MCC octogesimo sexto et consecrationis nostre vicesimo nono