Charter Document - 05181242

Universis Cristi fidelibus ad quos presens scriptum pervenerit David permissione divina prior ecclesie sancte Marie de Kinelwurthe et humilis eiusdem loci conventus salutem in Domino sempiternam Noverit universitas vestra nos et successores nostros teneri decano et capitulo Lichefeldensis qui pro tempore fuerint in centum solidos bonorum et legalium sterlingorum solvendos apud Lichefeld annuatim capellano qui in ecclesia Lichefeldensis pro anima bone memorie Willelmi de Manecestrie quondam decani Lichefeldensis et animabus omnium episcoporum canonicorum Lichefeldensis et omnium fidelium defunctorum perpetuo missam celebrabit ad tres terminos anni scilicet in festo sancti Michaelis quadraginta solidos et in festo resurrectionis Dominice xl solidos ad sustentationem eiusdem capellani predicti et viginti solidos die sancti Albani martiris de quibus dictus capellanus pascat pauperes per visum sacriste Lichefeldensis et capellani beate Marie eiusdem ecclesie vel panem emat in festo apostolorum Petri et Pauli sicut quod magis viderit expedire pauperibus errogandis Ad predicte vero pecunie solutionem suis terminis fideliter et integre faciendam obligamus dictis decano et capitulo bona nostra mobilia et immobilia Subiecimus nos etiam de consensu reverendi patris nostri episcopi Coventrensis et Lichefeldensis qui cum hec scriberentur episcopatui presidebat iurisdictioni decani et precentoris Lichefeldensis qui pro tempore fuerint ut si forsan aliquo terminorum cessaverimus in solutione pecunie supradicte possit eorum alter uter cui prius dicta cessatio fuerit intimata ex nostra concessione speciali sine cause cognitione appellatione remota et omni alia excusatione cessante quam non continet presens scriptum nos et successores compellere per censuram ecclesiasticam ad dictam solutionem integre faciendam et solvendam penam xl solidos fabrice Lichefeldensis ecclesie pro quolibet termino quo fuerit in solutione cessatum sorte nihilominus integra permanente et ad resarcienda dampna que per hec incurrerint et ad refundendas expensas quas pro petenda peccunia fecerint decanus et capitulum antedicti Si tamen per vacationem prioratus vel per tempus hostilitatis aliquo termino vel aliquibus terminis fuerit impedita solutio creato priore vel tempore tranquillitatis et pacis adveniente proximo termino subsequente quod tunc solvi debuit et quod dicto termino solvi integre persolvatur Excommunicamus autem in conventu nostro solempniter omnes qui presentem obligationem nostram presumpserint vel attemptaverint irritare Dederunt autem executores dicti decani sexies viginti marcas et decem ad emendas possessiones aut redditus ex quibus possit annuatim dicta pecunia pervenire quos quidem redditus aut possessiones sive emerimus sive non tenebimur tamen solvere sicut prescriptum est dictos centum solidos annuatim Siquid autem in hoc scripto fuerit emendandum nos bona fide pro voluntate predictorum decani et capituli sive etiam executorum predicti Willelmi de Manecestrie quondam decani Lichefeldensis defuncti promisimus et nos obligavimus emendare In premissorum autem testimonium et munimen presens scriptum sigillo prioris nostri et ecclesie nostre fecimus roborari Actum apud Lichefeld anno Domini millesimo CC quinquagesimo quarto quarto kalendas Iulii