Charter Document - 05181144

Honorius episcopus servus servorum Dei dilectis filiis abbati Premonstratensi et ceteris abbatis et canonicis Premonstratensis ordinis tam presentibus quam futuris regularem vitam professis inperpetuum In eminenti sedis apostolice specula licet in[meriti dispo] nente domino constituti pro singulorum statu soliciti esse compellimur et ea sincere tenemur amplecti que ad incrementum religionis pertinent et ad virtutum spectant ornatum quatinus religiosorum quies ab omni sit perturbatione secura et a iugo mundane oppression[is ser] vetur illesa cum apostolica fuerit tuitione munita Attendentes itaque quomodo religio et ordo vester multa refulgens gloria meritorum et gratia redolens sanctitatis palmites suos a mari usque ad mare extenderit ipsum ordinem et universas domos eiusdem ordinis apostolice protectionis presidio duximus confovendas et presenti privilegio muniendas Eapropter dilecti in Domino filii vestris iustis postulationibus benignius annuentes ad exemplar felicis recordationis Alexandri Lucii Urbani Clementis et Innocentii predecessorum nostrorum Romanorum pontificum universas regulares institutiones et dispositiones quas de communi consensu vel maioris et sanioris partis fecistis sicut inferius denotantur auctoritate apostolica roboramus et presentis scripti privilegio communimus videlicet ut ordo canonicus quemadmodum in Premonstratensi ecclesia secundum beati Augustini regulam et dispositionem recolende memorie Norberti quondam Premonstratensis ordinis institutoris et successorum suorum in candido habitu instututus esse dinoscitur per omnes eiusdem ordinis ecclesias perpetuis temporibus inviolabiliter observetur et eedem penitus observantie idem quoque libri qui ad divinum officium pertinent ab omnibus eiusdem ordinis uniformiter teneantur nec aliqua ecclesia vel persona ordinis vestri adversus communia ipsius ordinis instituta privilegium aliquod postulare vel obtentum audeat quomodolibet retinere Nulla etiam ecclesiarum ei quam genuit quamlibet terreni commodi exactionem imponat sed tantum pater abbas curam de profectu tam filii abbatis quam fratrum domus illius habeat et potestatem habeat secundum ordinem corrigendi que in ea noverit corrigenda et illi ei tanquam patri reverentiam filialem humiliter exhibeant et devote Abbas autem Premonstratensis ecclesie que mater esse dinoscitur aliarum non solum in hiis ecclesiis quas instituit sed etiam in omnibus aliis eiusdem ordinis et dignitatem et officium patris obtineat et ei ab omnibus tam abbatibus quam fratribus debita patri obedientia impendatur Preterea omnes abbates ordinis vestri singulis annis ad generale capitulum Premonstratense postposita omni occasione conveniant illis solis exceptis quos a labore vie corporis retardaverit infirmitas qui tamen idoneum pro se delegare debebunt nuntium per quem necessitas et causa remorationis sue capitulo valeat nuntiari Hii autem qui in remotioribus partibus habitantes sine gravi difficultate singulis annis se nequiverint capitulo presentare in eo termino conveniant qui in ipso eis capitulo fuerit constitutus Si vero quilibet abbatum vel prepositorum per contumaciam vestrum capitulum frequentare desierint liceat abbati Premonstratensi consilio sui capituli eos usque ad dignam satisfactionem sententia percellere regulari et sententiam quam prefatus Premonstratensis abbas sive in generali capitulo sive extra capitulum consilio coabbatum in prelatos et subditos totius ordinis vestri canonice tulerit nulli archiepiscoporum seu episcoporum nisi forte de mandato Romani pontificis liceat relaxare In generali igitur vestro capitulo presidente abbate Premonstratensi ceterisque considentibus et in spiritu Dei cooperantibus de hiis que ad edificationem animarum ad instructionem morum et ad informationem virtutum atque ad incrementum regularis discipline spectabunt sermo diligens habeatur Porro de omnibus questionibus et querelis tam spiritualibus quam temporalibus que in ipso capitulo proposite fuerint illud teneatur irrefragabiliter et servetur quod abbas Premonstratensis cum hiis qui sanioris consilii et magis idonei apparuerint iuste ac provide iudicabit Sane si abbas aliquis vestri ordinis infamis vel inutilis aut ordinis sui prevaricator inventus fuerit et prius per patrem suum abbatem aut per nuntios eiusdem ammonitus suum corrigere et emendare delictum neglexerit aut cedere si amovendus fuerit sponte noluerit auctoritate generalis capituli deponatur et depositus sine dilatione ad domum unde exivit seu ad aliam eiusdem ordinis quam elegerit sine ulla conditione temporalis commodi revertatur in obedientia abbatis sicut ceteri fratres ipsius domus firmiter permansurus id ipsum etiam alio tempore si necesse fuerit et capitulum sine scandalo vel periculo expectari nequiverit per abbatem Premonstratensem et patrem abbatem et alios abbates quos vocaverit fieri licebit Quod si depositus in se date sententie contumaciter contraire temptaverit tam ipse quam principales eius qui de ordine fuerint in sua contumacia fautores ab abbate Premonstratensi et ceteris abbatibus censura ecclesiastica donec satisfaciant arceantur Verum cum aliqua ecclesiarum vestrarum abbate proprio fuerit destituta vel cum ibi abbatis electio regulariter non fuerit celebrata sub patris abbatis potestate ac dispositione consistat et cum eiusdem consilio qui eligendus fuerit a canonicis eligatur Electo autem fratres ecclesie statim obedientiam promittant qui non quasi absolutus a potestate patris abbatis vel ordinis sui archiepiscopo vel episcopo in cuius diocesi fuerit presentetur plenitudinem ab eo officii percepturus ita tamen quod post factam archiepiscopo vel episcopo suo professionem occasione illa non transgrediatur constitutiones ordinis sui nec in aliquo eius prevaricator existat Si quis etiam ex vobis canonice electus in abbatem diocesano episcopo semel et iterum per abbates vestri ordinis presentatus benedictionem ab eo non potuerit obtinere ne ecclesia ad quam vocatus est destituta consilio periclitetur officio et loco abbatis plenarie secundum ordinem fungatur in ea tam in exterioribus providendis quam in interioribus corrigendis donec aut interventu generalis capituli vestri aut precepto Romani pontificis seu metropolitani benedictionem suam obtineat Porro nulla persona ecclesiastica pro crismate aut consecrationibus et ordinationibus aut pro sepultura pretium aut pro benedicendo abbate et deducendo in sedem suam palefridum aut aliquod aliud a vobis exigere nullus vestrum etiam si exigatur dare presumat quia et exigentem et dantem nota et periculum symoniace pravitatis involvit Ceterum si aliqua ecclesiarum vestrarum pastoris solatio destituta inter fratres de substituendo abbate discordia fuerit vel scissura suborta et ipsi facile ad concordiam vel unitatem revocari nequiverint pater abbas consilio coabbatum suorum eis idoneam provideat personam et illi eam sine contradictione recipiant in abbatem quam si recipere contempserint sententie subiaceant quam pater abbas cum consilio coabbatum suorum in eos duxerit auctoritate ordinis promulgandam Ad hec quoniam Premonstratensis ecclesia prima mater est omnium ecclesiarum totius ordinis et patrem super se alium non habet sicut ad cautelam et custodiam ordinis statutum est per tres primos abbates Laudun Florefien et Cussiacn annua ibidem visitatio fiat et si quid in ipsa domo corrigendum fuerit absque maiori per eos audientia corrigatur Quod si abbas in corrigendo tepidus et fratres sepius moniti incorrigibiles permanserint ad generale capitulum referatur et sicut melius visum fuerit consilio generalis capituli emendetur et sententia in hac parte capituli sine retractatione aliqua observetur Quotiens vero ecclesia Premonstratensis sine abbate fuerit ad prefatos tres abbates eius cura respiciat et a canonicis ipsius ecclesie cum eorum consilio persona in abbatem idonea eligatur ad consilium suum quatuor aliis abbatibus ad eandem ecclesiam pertinentibus pariter advocatis quos ipsi canonici providerint advocandos Liceat quoque unicuique matri ecclesie ordinis vestri cum consilio abbatis Premonstratensis de abbatibus ecclesiarum que ab ea processisse noscuntur sive etiam de alia eiusdem ordinis inferiore ecclesia sibi quemcunque voluerit si tamen idoneus exstiterit in abbatem assumere Personam autem de alio ordine nulla ecclesiarum vestrarum sibi eligat in abbatem nec vestri ordinis aliqua in abbatem monasterii alterius ordinis nisi de auctoritate Romane ecclesie ordinetur Nulli etiam canonicos vel conversos vestros sine licentia abbatum recipere aut susceptos liceat retinere Sane nulli ecclesie vestri ordinis liceat ad aliquam aliam professionem temeritate qualibet se transferre Si que vero ecclesie canonicorum alterius ordinis ad ordinem vestrum venerint ad ecclesiam vestri ordinis habeant sine refragatione respectum in qua vestrum noscuntur ordinem assumpsisse Preterea si inter aliquas ecclesias vestri ordinis de temporalibus questio emerserit non extra ordinem ecclesiastica vel secularis audientia requiratur sed mediante Premonstratensi abbate et ceteris quos vocaverit aut caritative inter eas componatur aut auditis utrinque rationibus eadem controversia iusto iudicio terminetur Ad maiorem quoque ordinis vestri pacem conservandam districtius prohibemus ne aliquis prelatorum vel subditorum vestrorum in hiis que ad disciplinam et instituta ordinis spectant audeat prout statutum est in Lateranensi concilio appellare sed si quisquam appellare attemptaverit nichilominus illi quorum interest regularem disciplinam exercere debebunt De cetero quoniam a strepitu et tumultu secularium remoti pacem et quietem diligitis grangias vestras et curtes sicut et atria ecclesiarum a pravorum incursu et violentia liberas fore sancimus prohibentes ut nullus ibi hominem capere spoliare verberare seu interficere aut furtum vel rapinam committere audeat Ob evitandas vero secularium virorum frequentias liberum sit vobis salvo iure diocesanorum episcoporum oratoria in grangiis et curtibus vestris construere et in ipsis vobis et familie vestre divina officia cum necesse fuerit celebrare et ipsam familiam nisi aliqui sint qui in vicinia propria habeant domicilia ad confessionem communionem et sepulturam cum vestri ordinis honestate suscipere Liceat quoque vobis personas liberas et absolutas e seculo fugientes ad conversionem recipere et eas cum rebus suis sine contraditione aliqua retinere Infirmos quoque absolutos qui in extrema voluntate ad vos se transferri aut apud vos sepeliri deliberaverint nullus impedire seu res eorum ligitimas detinere presumat salva tamen heredum legitima portione et canonica iustitia illarum ecclesiarum a quibus mortuoroum corpora assumuntur Ad maiorem etiam ordinis vestri reverentiam et regularis discipline observantiam vobis filii abbates subiectos vestros ligandi et solvendi plenam concedimus facultatem Quia vero singula que ad religionis profectum et animarum salutem ordinastis presenti abbreviationi nequiverunt annecti nos cum hiis que scripta sunt consuetudines vestras quas inter vos religionis intuitu regulariter statuistis et Deinceps auctore domino statuetis auctoritate apostolica roboramus et vobis vestrisque successoribus et omnibus qui ordinem vestrum professi fuerint perpetuis temporibus inviolabiliter decernimus observandas nec alique littere habeant firmitatem que tacito nomine Premonstratensis ordinis contra libertates vobis ab apostolica sede indultas fuerint impetrate Sane laborum vestrorum quos propriis manibus aut sumptibus colitis de possessionibus habitis ante conscilium generale sive de ortis et virgultis pratis paschuis et piscationibus vestris vel de nutrimentis animalium vestrorum seu etiam de novalibus nullus a vobis decimas exigere vel extorquere presumat Interdicimus vero episcopis et aliis ecclesiarum prelatis nisi servato evectionis numero in Lateranensi conscilio constituto in vestris monasteriis hospitari Ad grangias autem vestras et ad curtes hospitandi gratia nonnisi in magna necessitate divertant et tunc contenti sint ipsarum mansionum cibariis consuetis cum honestate atque caritate exhibitis Nulli autem seculari persone vel ecclesiastice in aliqua domorum vestrarum liceat carnibus vesci nisi manifeste egritudinis causa et hoc in solis monasteriis conventualibus vestris Prohibemus insuper ne aliqua persona fratres ordinis vestri audeat ad secularia iudicia provocare Sed si quis adversus eos aliquid sibi crediderit de iure competere sub ecclesiastici examine iudicii experiendi habeat facultatem Licitum preterea vobis sit in causis vestris fratres vestros idoneos ad testificandum adducere et eorum testimonio sicut rectum fuerit et propulsare violentiam et iustitiam vendicare Prohibemus quoque ne cuilibet ecclesiastice vel seculari persone fas sit in ecclesiis vestris contra statuta Lateranensis concilii tallias exercere vel quaslibet alias vobis ineptas et iniquas exactiones imponere Interdicimus etiam vobis ne feras aves canes sive cetera huiusmodi curiositatis animalia a quolibet ad nutriendum sive custodiendum in detractionem vestri ordinis suscipere presumatis Porro ut quietius Deo servire possitis et discurrendi a vobis necessitas auferatur presenti scripto duximus indulgendum ut si episcopis vestris aut malitiose differentibus vel pro iusto impedimento non valentibus ordinationes [] ecclesiastica ministeria vobis conferre et aliquem episcopum de cuius ordinatione et officio plena sit vobis notitia hospitem vos habere contigerit liberum sit vobis ab eo et ordinationes [] sacramenta suscipere dum tamen preiudicium diocesano episcopo non debeat generare Preterea postulatione vestra clementius inclinati presenti pagina duximus inhibendum ne quis archiepiscopus vel episcopus aut eorum officiales ecclesias vestras seu regulares personas earum absque manifesta et rationabili causa interdicere seu suspendere presumat Sed si quid in eis fuerit corrigendum ad audientiam generalis capituli Premonstratensis referatur et ibi prout iustitie et honestati congruerit emendetur Porro si qui episcopi aut eorum officiales in personas vestras aut ecclesias sententiam aliquam contra libertatem eisdem a predecessoribus nostris vel a nobis indultam promulgaverint eandem sententiam tanquam contra apostolice sedis indulta prolatam statuimus irritandam Decernimus ergo ut nulli omnino hominum liceat prefatam ecclesiam temere perturbare aut eius possessiones auferre vel ablatas retinere minuere seu quibuslibet vexationibus fatigare sed omnia integra conserventur eorum pro quorum gubernatione ac sustentatione concessa sunt usibus omnimodis profutura salva sedis apostolice auctoritate Siqua igitur in futurum ecclesiastica secularisve persona hanc nostre constitutionis paginam sciens contra eam temere venire temptaverit secundo tertiove commonita nisi reatum suum digna satisfactione correxerit potestatis honorisque sui dignitate careat reamque se divino iudicio existere de perpetrata iniquitate cognoscat et a sanctissimo corpore et sanguine Dei et Domini nostri Iesu Cristi redemptoris nostri aliena fiat atque in extremo examine districte subiaceat ultioni Cunctis autem eidem loco sua iura servantibus sit pax Domini nostri Iesu Cristi quatinus et hic fructum bone actionis percipiant et apud districtum iudicem premia eterne pacis inveniant Amen Dat Lateran per manum Ranerii sancte Romane ecclesie vicecancellarii v idus Maii indictione vi incarnationis Dominice anno MCCXVII pontificatus vero dompni Honorii pape iii anno i