Charter Document - 05180260
| Charter Number: | 05180260 |
|---|---|
| Cartulary Title: | Coventry and Lichfield 1215-1256 Volume 43 |
| Charter Language: | Latin |
| Charter Origin: | Religious |
| Charter Type(s): | Ordination |
| Date: | 1253 |
| Date type: | Internal, A.D., Calendar |
| Resource Link(s): |
|
Charter:
Omnibus Cristi fidelibus hoc presens scriptum visuris vel audituris Rogerus miseratione divina Coventr et Lich episcopus salutem in Domino sempiternam Cum iuxta apostolum omnibus simus debitores et dum tempus habemus bonum ad omnes operari teneamur maxime viris religiosis sancte conversationis et hospitalitatem ferventi devotione sectantibus ex officii nostri debito debemus benefacere quatinus stipendiis necessariis ditati sic Deo militent ut necesse non habeant negotiis secularibus implicari Ea propter cum dilecti in Cristo filii prior et conventus de Tuttesbir ecclesiam de Matherfeld cum suis capellis de Wettindon et de Buttrindon in qua ius patronatus habere dinoscuntur spontanea eorum voluntate nostre ordinationi sub misissent considerantes religionem et honestatem eorundem dominum habentes pre oculis sic de eadem ecclesia cum suis capellis duximus ordinandum videlicet quod cedente vel decedente rectore dicte ecclesie de Matherfeld prefati prior et conventus de Tuttesbir habeant et teneant ipsam ecclesiam cum suis capellis et omnibus suis pertinentiis in proprios usus inperpetuum reddendo de bonis eiusdem ecclesie annuatim Lich ecclesie in augmentum commune canonicorum decem marcas argenti apud Lich in festo Pasche salva in eadem ecclesia vicaria sex decem marcarum cum manso competenti per nos vel successores nostros taxanda et in certis dicte ecclesie proventibus ordinanda ad quam successive semper cum vacaverit dicti prior et conventus capellanum ydoneum loci dioecesano presentabunt qui per ipsum admissus instituetur vicarius in eadem Vicarius vero eiusdem ecclesie qui pro tempore fuerit dicte matrici ecclesie de Matherfeld et sepe dictis capellis tum per se tum per alios capellanos et ministros honestos et ydoneos faciet suis sumptibus de serviri et omnia alia onera ordinaria debita et consueta dictam ecclesiam cum suis pertinentiis contingentia sustinebit salvis in omnibus nobis et successoribus nostris in memorata ecclesia cum suis capellis iure pontificali et parochiali et ecclesiarum nostrarum Coventr et Lich auctoritate Et ut hec nostra ordinatio perpetue firmitatis robur optineat presens scriptum sigilli nostri munimine fecimus roborari Hiis testibus Dominis Thoma precentore et R thesaurario Lych magistro H de Wishawe magistro Thoma Comin domino Rogero de Thorton canonicis Lych domino Willelmo de Burton clerico et aliis Datum apud Heywode ii kalendas Aprilis anno Domini MCC quinquagesimo tertio