Charter Document - 05180254
| Charter Number: | 05180254 |
|---|---|
| Cartulary Title: | Coventry and Lichfield 1215-1256 Volume 43 |
| Charter Language: | Latin |
| Charter Origin: | Religious |
| Charter Type(s): | Arbitration |
| Date: | 1254 |
| Date type: | Internal, A.D., Episcopal, Feast |
| Resource Link(s): |
|
Charter:
Universis sancte matris ecclesie filiis presentes litteras visuris vel audituris Rogerus miseratione divina Coventr et Lich episcopus salutem in Domino sempiternam Noveritis quod cum abbas et conventus Salop ecclesiam de Egemundon cum capellis eius et aliis suis pertinentiis omnibus nostre diocesis cuius ius patronatus ad eos pertinere dinoscitur ordinationi nostre per eorum litteras patentes dictorum abbatis et conventus sigillo munitas submisissent promittentes se ratum habituros et firmum quicquid nos circa dictas ecclesiam et eius capellas necnon earum pertinentia duxerimus ordinandum attendentes quod monasterium Salop ob casus varios et diversos ac inopinatos propter onera debitorum quorum sarcina premebatur quod dolentes referimus ita quod nullum aliud superesse credebatur remedium nisi ut diripiendo daretur in manibus creditorum nos eidem monasterio pie paternitatis compatientes affectu eiusque studiose cupientes gravamina reservari necnon et cultus divini in ecclesia Lich summa intensione desiderantes augmentum de consensu Radulphi decani et capituli Lich de prefata ecclesia et eius capellis cum suis pertinentiis taliter duximus ordinandum videlicet quod cum ipsam vacare contigerit eadem ecclesia de Egmundon et eius capelle cum earum pertinentiis prefatis abbati et conventui Salop necnon eorum successoribus in usus proprios cedant inperpetuum salva vicaria competenti secundum facultatem dicte ecclesie per nos et successores nostros ordinanda ad quam dicti abbas et conventus et eorum successores idoneam presentabunt personam quotiens ipsam vacare contigerit salvaque competenti portione de bonis predictarum ecclesie et capellarum cum earum pertinentiis commune ecclesie nostre Lich seu in aliis eiusdem ecclesie piis usibus per nos vel successores nostros convertendis taxanda et assignanda salvis etiam nobis et successoribus nostris in ecclesia prelibata iure pontificali et parochiali ac Coventr et Lich ecclesiarum dignitate In cuius rei testimonium presentibus litteris sigillum nostrum duximus apponendum Dat apud Brewode die sabbati proxima post festum sancte Katerine virginis anno Domini millesimo CC quinquagesimo quarto pontificatus nostri anno decimo