Charter Document - 05180250

Universis sancte matris ecclesie filiis ad quos presens scriptum pervenerit Rogerus Dei gratia Coventr et Lich episcopus eternam in Domino salutem Universitati vestre notum facimus quod cum inter abbatem et conventum de Hagmon ex parte una et priorem et conventum de Ronton ex altera super subiectione visitatione et correctione prioratus de Ront et professione et obedientia et etiam super procurationibus certis quas idem abbas a dicti prioratus canonicis exigebat et quibusdam aliis abbathiam de Hagmon et prioratum ipsum contingentibus videlicet in electionibus abbatis de Hagmon et prioris de Ront et aliis coram iudicibus a domino papa delegatis questiones mote fuissent hinc inde partes tandem appertis intelligentie oculis dampna et pericula in spiritualibus et temporalibus ex huiusmodi discordiis et contentionibus prefatis domibus conspicientes minuere viam pacis eligere decreverunt et omnibus impetratis et impetrandis super hiis renuntiantes super omnibus prenotatis necnon et super omni iure tam proprietatis quam possessionis quod in predictis ecclesiis ad invicem habuerunt seu habere potuerunt ordinationi nostre de consilio dilectorum in Cristo filiorum dominorum Willelmi decani thesaurarii precentoris Lich et magistri Petri archidiaconi Salop faciende se pure absolute et spontanea voluntate penitus subiecerunt fideliter et bona fide utriusque domus et instrumentis intervenientibus promittentes se ordinationi nostre in omnibus et per omnia absque contradictione qualibet parituros ita quod nos et successores nostri de mero et expresso partium consensu ad observationem ordinationis nostre sine strepitu iudiciali per censuram ecclesiasticam utramque partem compellere possimus inperpetuum Nos igitur attendentes quod ex nexu mutuo dictarum ecclesiarum et ex questionibus occasionaliter ex hoc ortis et dampna temporalia provenerunt et caritas refriguit inter eas deliberato consilio ac cum viris prefatis diligenti habito tractatu auditis et intellectis ac ponderatis in omnibus que circa statum utriusque domus quoad temporalia et spiritualia erant audienda et intelligenda et ponderanda volentes etiam lites minuere ut subiecti nostri sub omni quiete consistant invocata spiritus sancti gratia super omnibus premissis inter predictas domos de eorundem et aliorum iuris peritorum consilio ordinavimus et decrevimus sub hac forma videlicet quod prioratus de Ront tam in capite quam in membris quoad temporalia et spiritualia ab omni subiectione et obedientia dictorum abbatis et conventus de Hagmon perpetuo remaneat quietus et absolutus Abbatem vero et conventum et monasterium de Hagmon ab omni nexu et cura seu alio iure quod in prioratu de Ront habuerunt seu habere potuerunt decrevimus penitus absolutos Insuper prefatos abbatem et conventum et ipsorum monasterium de Hagmon ab omni iure quod prefati prior et conventus de Ronton in eadem abbatia habuerunt seu habere potuerunt sicut in abbatis electione et aliis decrevimus totaliter absolutos Ita quod nec predicti abbas et conventus de Hagmon in prioratu de Ronton aliquid iuris sibi de cetero vendicent sicut nec prior et conventus de Ronton in abbatia memorata quicquam iuris poterunt inposterum vendicare sed utraque domus ab alterius subiectione obligatione seu nexu quocumque perpetuo remaneat absoluta hoc tamen excepto quod in recompensationem temporalium que dicti abbas et conventus a dicto prioratu percipere consueverunt prior et conventus de Ront per hanc nostram ordinationem dictis abbati et conventui annuatim solvent inperpetuum centum solidos ad duos anni terminos videlicet ad Pascham quinquaginta solidos et ad festum sancti Michaelis quinquaginta solidos et sic inter eos pax perpetua firmius observetur In huiusmodi autem ordinationis nostre testimonium et memoriam presens scriptum sigillo nostro ac sigillo capituli nostri Lich necnon et sigillis partium communitum in ecclesia nostra Lich fecimus deponi Act apud Heywod in crastino cinerum anno gratie millesimo CCXL sexto pontificatus scilicet nostri anno secundo Ad hec volumus quod dicti prior et conventus per hanc nostram ordinationem terminis suprascriptis in ecclesia de Chesworthin quolibet anno peccuniam solvant memoratam